Saran qalasynyŋ jüzge juyq jasy, erıktıler men «Jasyl el» eŋbek jasaǧynyŋ sarbazdary böget maŋyndaǧy su qoimasynyŋ aumaǧynda ekologiialyq senbılık ötkızdı. Olar jaǧalau boiyn qoqystan tazartyp, tūrǧyndardyŋ demalys aimaǧyn retke keltırdı.
Ekologiialyq aksiianyŋ basty maqsaty – jastar arasynda ekologiialyq mädeniettı qalyptastyru, qorşaǧan ortany qorǧau mäselelerıne qoǧam nazaryn audaru jäne erıktılık qyzmettı nasihattau.
Saran qalalyq Jastar resurstyq ortalyǧynyŋ basşysy Aiym Qanapiianovanyŋ aituynşa, tabiǧatty qorǧau – ärbır azamattyŋ ortaq mındetı.
— Qorşaǧan ortanyŋ tazalyǧy men ekologiialyq qauıpsızdık – barşamyzǧa ortaq jauapkerşılık. Mūndai ıs-şaralar tabiǧatty saqtauǧa ǧana emes, jastardyŋ azamattyq belsendılıgın arttyryp, tuǧan jerge degen janaşyrlyq pen ūqypty közqarasyn qalyptastyruǧa da yqpal etedı, — dedı ol.
Aksiiaǧa qatysuşylardyŋ bırlesken eŋbegınıŋ nätijesınde su qoimasy jaǧalauy edäuır tazaryp, demalys aimaǧynyŋ kelbetı jaqsardy. Osyndai igı bastamalar jastardy maŋyzdy qoǧamdyq jobalar töŋıregıne toptastyryp, tabiǧatqa qamqorlyq är adamnyŋ jeke jauapkerşılıgınen bastalatynyn taǧy bır märte eske salady.
Mūndai şaralardyŋ maŋyzyn arttyryp otyrǧan bastamalardyŋ bırı – jalpyūlttyq «Taza Qazaqstan» baǧdarlamasy.
Baǧdarlama ekologiialyq mädeniettı damytuǧa, tūrǧyndardy qoǧamdyq paidaly jūmystarǧa keŋınen tartuǧa jäne qorşaǧan ortaǧa degen jauapkerşılıktı nyǧaituǧa baǧyttalǧan.
