Tailandta joǧalyp ketken qazaqstandyq reper Kislo-Sladkii daqap atymen tanylǧan Darhan Jūmabek aman-esen tabyldy, dep habarlaidy "Adyrna".
Būl turaly rejisser Parasat İbraev özınıŋ Instagram paraqşasynda habarlady. Ol ızdeu jūmystaryna qatysqan jäne qoldau bıldırgen barlyq azamattarǧa alǧys bıldırdı.
«Darhan aman-esen tabyldy. Osy künderı alaŋdap, ızdep, aqparat taratqan jäne qoldau körsetken barşaŋyzǧa ülken raqmet. Endı tek jaqsy jaŋalyqpen bölısetın uaqyt keldı», – dep jazdy Parasat İbraev.
Telegram-daǧy SHOT arnasynyŋ mälımetınşe, önerpaz Phuket qalasyndaǧy medisinalyq mekemelerdıŋ bırınen tabylǧan. Aldyn ala aqparat boiynşa, onyŋ densaulyǧyna auyr zaqym kelmegen.
Aita keteiık, būǧan deiın Parasat İbraev reperdıŋ joǧalyp ketkenın habarlap, ony ızdeuge kömek körsetu üşın köşı-qon polisiiasyna jügıngen.
