Foto: ERR
Şveisariiada ötken İran men AQŞ arasyndaǧy joǧary deŋgeidegı kelıssözderdıŋ alǧaşqy raundy aiaqtaldy. İran bilıgınıŋ mälımdeuınşe, taraptar Livandaǧy äskeri qaqtyǧysty toqtatu baǧytynda aitarlyqtai ılgerıleuge qol jetkızgen, dep habarlaidy “Adyrna” ūlttyq portaly Euronews-ke sıltep.
Aqparatqa säikes, kelıssözder nätijesınde İran men AQŞ Livandaǧy atysty toqtatu rejimınıŋ saqtaluyn baqylauǧa arnalǧan arnaiy üilestıru ortalyǧyn qūruǧa kelıstı. Būl qūrylymnyŋ jūmysyna Livan ükımetı de qatysady. Deldaldyq mındettı atqarǧan Päkıstan men Katar ökılderı kezdesudıŋ «oŋ jäne syndarly jaǧdaida» ötkenın habarlady.
Taraptar aldaǧy aptalarda tehnikalyq konsultasiialar ötkızıp, yqtimal beibıt kelısımnıŋ naqty tetıkterın äzırleudı josparlap otyr. Diplomatiialyq prosess 60 künge eseptelgen jäne onyŋ basty maqsaty – İranǧa qarsy äskeri ıs-qimyldardy tolyq toqtatu jönındegı kelısımge qol jetkızu.
Degenmen kelıssözderdegı negızgı tüitkıl Livan mäselesı bolyp qalyp otyr. İran Livandaǧy äskeri äreketterdı toqtatu turaly tarmaqtyŋ kelısımge engızıluın talap etse, İzrail öz aumaǧyna qauıp töndıretın qaruly toptarǧa qarsy operasiialar jürgızu qūqyǧyn saqtap qaludy közdeidı.
Kelıssözder barysynda Ormuz būǧazy mäselesı de köterıldı. İrannyŋ būǧazdaǧy jaǧdaiǧa qatysty mälımdemelerınen keiın taraptar halyqaralyq teŋız qatynasynyŋ qauıpsızdıgın qamtamasyz etu joldaryn talqylaǧan. AQŞ būǧaz arqyly keme qozǧalysy jalǧasyp jatqanyn mälımdedı.
Sonymen qatar iadrolyq baǧdarlamaǧa qatysty mäseleler boiynşa da qyzu pıkır almasu ötken. Sarapşylardyŋ pıkırınşe, aldaǧy tehnikalyq konsultasiialar kelıssözderdıŋ taǧdyryn aiqyndaityn maŋyzdy kezeŋ bolmaq.
Aita keteiık, kelıssözderdıŋ bastaluy aldynda AQŞ prezidentı Donald Tramptyŋ İranǧa qatysty qataŋ mälımdemelerı jaǧdaidy kürdelendırgen edı. Soǧan qaramastan taraptar dialogty jalǧastyruǧa uaǧdalasyp, qaqtyǧysty diplomatiialyq jolmen retteu mümkındıgın saqtap qaldy.
