26 mamyrda Qazaqstandaǧy eŋ ırı mūnai ken orny – Teŋızdegı täulıktık mūnai öndıru kölemı 125 myŋ tonnadan 5–10 myŋ tonnaǧa deiın tömendedı. Būl turaly Reuters agenttıgı jazdy, dep habarlaidy «Adyrna» tılşısı.
Būl jaǧdaiǧa öndırıstık aqau sebep bolǧan. Sondai-aq Teŋızden Qazaqstan mūnaiynyŋ şamamen 80 paiyzy eksporttalatyn Kaspii qūbyr konsorsiumy jüiesıne jetkızıletın mūnai kölemı de öndırıstıŋ tömendeuıne säikes qysqarǧan. Derekközderdıŋ mälımetınşe, qazırgı uaqytta ken ornyndaǧy öndırıs bırtındep qalpyna keltırılıp jatyr.
Ken ornyn igeruşı «Teŋızşevroil» kompaniiasynyŋ 50 paiyz ülesıne ielık etetın amerikalyq Chevron kompaniiasy Teŋız ken ornynda «eleusız operasiialyq aqau» bolǧanyn mälımdedı.
«Kompaniia üşın basymdyq – qauıpsız ärı senımdı jūmysty qamtamasyz etu. «Teŋızşevroil» öz qyzmetı men kommersiialyq mäselelerıne qatysty qosymşa aqparat bermeidı», – delıngen kompaniia tüsınıktemesınde.
Energetika ministrlıgı de Teŋız ken ornyndaǧy öndırıstıŋ tömendeuıne qatysty pıkır bıldırdı.
«2026 jyldyŋ 28 mamyrynda «Teŋızşevroil» kompaniiasynyŋ öndırıstık nysandarynyŋ bırınde operasiialyq aqau bolyp, sonyŋ saldarynan mūnai öndıru kölemı uaqytşa tömendedı. Qazırgı uaqytta kompaniia qajettı jedel şaralardy qabyldap jatyr. Ken ornyndaǧy öndırıs qalpyna keltıru kezeŋınde. Qyzmetkerlerge, halyqqa jäne qorşaǧan ortaǧa qauıp töngen joq», – dep mälımdedı ministrlık.
Reuters derekközderı öndırıstı bır apta ışınde kezeŋ-kezeŋımen qalpyna keltıru josparlanǧanyn aitqan.
Aita keteiık, Teŋız – Qazaqstandaǧy eŋ ırı mūnai ken orny. Jobanyŋ operatory – «Teŋızşevroil» kompaniiasy. Kompaniia ülesterı Chevron, ExxonMobil, «QazMūnaiGaz» jäne «Lukoil» kompaniialaryna tiesılı. Teŋız jäne Korolev ken oryndarynyŋ öndırıletın mūnai qory 1,4 mlrd tonnany nemese 11,5 mlrd barreldı qūraidy. Jalpy barlanǧan qor kölemı boiynşa Teŋız ken ornynda 3,1 mlrd tonna nemese 25 mlrd barrel, al Korolev ken ornynda 200 mln tonna nemese 1,6 mlrd barrel mūnai bar.
