Medisina halyqaralyq serıktestık alaŋyna ainalǧanda, onyŋ igılıgın eŋ aldymen pasientter köredı. Osyndai maŋyzdy ūstanym aiasynda Astanada otandyq onkologiia salasy üşın aituly oqiǧa öttı – Ūlttyq ǧylymi onkologiia ortalyǧy (ŪǦOO) men Atom energiiasy jönındegı halyqaralyq agenttık (MAGATE) yntymaqtastyq turaly ekıjaqty kelısımge qol qoidy.
Qūjat radiasiialyq onkologiia, iadrolyq medisina, diagnostikalyq vizualizasiia, medisinalyq fizika, radiofarmasiia jäne medisinadaǧy radiasiialyq qauıpsızdık baǧyttaryn qamtidy. Kelısımge MAGATE-nıŋ bas direktory Rafael Mariano Grossidıŋ Qazaqstanǧa sapary aiasynda qol qoiyldy.
Kelısımge qol qoiu otandyq onkologiiany damytu men radiasiialyq medisina salasyndaǧy halyqaralyq yntymaqtastyqty nyǧaitudyŋ strategiialyq qadamy boldy. Negızgı baǧyttardyŋ bırı – Ūlttyq ǧylymi onkologiia ortalyǧyn (ŪǦOO) MAGATE-nıŋ älem boiynşa onkologiialyq kömektıŋ zamanaui türlerıne qoljetımdılıktı keŋeituge baǧyttalǧan Rays of Hope jahandyq bastamasy aiasyndaǧy äleuettı Anchor Centre retınde damytu.
Josparlanǧan ıs-şaralar tolyq jüzege asqan jaǧdaida, ŪǦOO älemdegı MAGATE-nıŋ 19-şy Anchor Centre ortalyǧyna jäne Ortalyq Aziiadaǧy alǧaşqy osyndai ortalyqqa ainalady.
MAGATE-nıŋ bas direktory Rafael Mariano Grossi radiasiialyq onkologiia men säulelık terapiia salasyndaǧy Qazaqstanmen yntymaqtastyqtyŋ bügınde joǧary deŋgeide damyp kele jatqanyn jäne onyŋ bükıl öŋır üşın maŋyzy zor ekenın atap öttı.
«Bız Ūlttyq ǧylymi onkologiia ortalyǧynyŋ MAGATE-men yntymaqtastyq aiasynda jürıp ötetın damu jolyn aiqyndaǧymyz keledı. Būl tek ortalyqtyŋ özıne jaŋa mümkındıkter aşyp qana qoimai, öŋırlık yntymaqtastyqqa da negız bolady. Onkologiialyq aurular men odan bolatyn ölım-jıtım deŋgeiı älı de joǧary. Qazaqstannyŋ onkologiialyq kömektı damytuǧa erekşe jauapkerşılıkpen qarap otyrǧany zor qūrmetke laiyq. Bügıngı kelısımder özara bailanystarymyzdy nyǧaityp, älemdık deŋgeidegı ortalyqty odan ärı damytuǧa negız bolady dep senemın», – dedı märtebelı meiman.
Yntymaqtastyq aiasynda taraptar bılım beru baǧdarlamalaryn jüzege asyrudy, halyqaralyq taǧylymdamalar men ǧylymi saparlar ūiymdastyrudy, sondai-aq ŪǦOO mamandarynyŋ zertteu jobalary men agenttıktıŋ saraptamalyq missiialaryna qatysuyn josparlap otyr.
Negızgı nazar radiasiialyq onkologiia, iadrolyq medisina, medisinalyq fizika jäne radiofarmasiia salalary boiynşa mamandar daiarlauǧa audarylady. Sonymen qatar ŪǦOO radiasiialyq medisina men onkologiia baǧytynda kadr daiarlaityn öŋırlık qūzyret jäne bılım ortalyǧy retınde damudy közdeidı.
Jekelegen baǧyttardyŋ bırı retınde sapa menedjmentı jüiesın jetıldıru közdelgen. Atap aitqanda, sapany basqarudyŋ keşendı jüiesın engızu, ışkı auditter jürgızu jäne ŪǦOO-nyŋ MAGATE standarttaryna säikes Anchor Centre retınde jūmys ısteuge daiyndyǧyn bırlesıp baǧalau josparlanyp otyr.
Sonymen qatar halyqaralyq sarapşylar ŪǦOO-nyŋ eskı korpusyn rekonstruksiialau barysynda tehnikalyq jäne saraptamalyq qoldau körsetedı. Būl radiasiialyq medisina infraqūrylymyn jaŋǧyrtudy, joǧary tehnologiialyq jabdyqtarǧa arnalǧan bölmelerdı daiyndaudy, sonyŋ ışınde jelılık üdetkıştermen jabdyqtaudy qamtidy.
Būl serıetestıktıŋ maŋyzy erekşe. Sebebı qazırgı onkologiialyq kömektı halyqaralyq täjıribe almasusyz, ǧylymi ärıptestık pen älemdık ozyq täjıribelerdı engızusız damytu mümkın emes. Qol qoiylǧan kelısım ŪǦOO-nyŋ Ortalyq Aziiadaǧy jetekşı onkologiialyq ortalyqtardyŋ bırı retındegı pozisiiasyn nyǧaityp, otandyq onkologiialyq qyzmettı jahandyq käsıbi qauymdastyqqa yqpaldastyruǧa jaŋa mümkındıkter aşady.
Qūjatqa MAGATE-nıŋ bas direktory Rafael Mariano Grossi men ŪǦOO Basqarma töraǧasy Jandos Bürkıtbaev qol qoidy. Kelısım üş jyl merzımge jasalyp, keiın ony ūzartu mümkındıgı qarastyrylǧan.
