Si Szinpin Türkımenstanǧa ekı tarapqa da qolaily uaqytta resmi saparmen baruǧa daiyn ekenın mälımdedı, dep habarlaidy "Adyrna" ūlttyq portaly.
Qytai basşysynyŋ Serdar Berdımūhamedovke joldaǧan hatyn 20 mamyr künı Türkımenstannyŋ memlekettık TDH agenttıgı jariialady.
«Şaqyruyŋyz üşın alǧys bıldıremın jäne ekı tarapqa da yŋǧaily uaqytta Türkımenstanǧa baruǧa daiynmyn. Būl mäsele boiynşa ekı eldıŋ syrtqy ıster ministrlıkterı tyǧyz bailanysta jūmys ıstei alady», – delıngen joldauda.
Qytai basşysy Si Szinpin Qytai men Türkımenstan arasyndaǧy jan-jaqty strategiialyq serıktestıktı damytuǧa erekşe män beretının aityp, Serdar Berdımūhamedovpen tūraqty jūmys bailanysyn jalǧastyruǧa niettı ekenın jetkızdı. Qytai töraǧasynyŋ sözınşe, Beijıŋ Türkımenstanmen türlı saladaǧy özara tiımdı yntymaqtastyqty tereŋdetudı qoldaidy. Sonymen qatar ekı el arasyndaǧy yntymaqtastyq komitetı ūsynystardy zerdelep, tiıstı jaǧdai jasalǧan kezde olardy jüzege asyra alatyny aitylǧan.
«Qytai tarapy Türkımenstanmen bırlesıp, yntymaqtastyqtyŋ jaŋa jarqyn ülgılerın qalyptastyruǧa jäne Qytai men Türkımenstannyŋ ortaq taǧdyr qauymdastyǧynyŋ mazmūnyn üzdıksız tolyqtyruǧa daiyn», – delıngen hatta.
Äzırge Si Szinpintyŋ Türkımenstanǧa naqty qai künı baratyny jariialanǧan joq.
