Germaniia Qazaqstannyŋ būrynǧy bas kölık prokurory Maqsat Düisenovtı ekstradisiialaudan bas tartty. Būl turaly Bas prokuratura aitty, dep habarlaidy «Adyrna» tılşısı QazTAG-qa sılteme jasap.
«Germandyq tarap ony beruden sebebın körsetpei bas tartqanyn habarlaimyz. Atalǧan tūlǧaǧa ızdeu jariialau toqtatylǧan joq, qylmystyq qudalau jalǧasuda. Qazırgı uaqytta ıs boiynşa män-jailardy anyqtauǧa baǧyttalǧan ıs-şaralar, sonyŋ ışınde şet memleketterdıŋ qūzyrettı organdarymen özara ıs-qimyl jasau arqyly jürgızılıp jatyr»,– delıngen habarlamada.
Bas prokuratura Düisenov ısınıŋ män-jaiyn aşyp körsetpegen.
«QR QPK-nıŋ 201-babynyŋ talaptaryna säikes sotqa deiıngı tergeudıŋ özge derekterı jariia etuge jatpaidy», – delıngen vedomstvo jauabynda.
Eske salsaq, 2025 jyldyŋ qyrküiek aiynyŋ basynda Qazaqstannyŋ būrynǧy bas kölık prokurory Maqsat Düisenovke ızdeu jariialanǧan bolatyn. Keiın onyŋ Germaniianyŋ Fiurt qalasynda ūstalǧany habarlanǧan edı. Ötken jyldyŋ qazan aiynda Bas prokuratura ökılderı ony Qazaqstanǧa ekstradisiialau mümkın ekenın mälımdegen.
Maqsat Düisenovtıŋ aty atalyp otyrǧan negızgı epizodtyŋ bırı – köp jyldan berı qoǧam nazarynda kele jatqan «Qorǧas ısı». Būl ıs Qazaqstan-Qytai şekarasyndaǧy «Qorǧas» keden beketınde 2010 jyldardyŋ basynda anyqtalǧan auqymdy korrupsiialyq shemaǧa bailanysty. 2011 jyldyŋ soŋynda qarjy polisiiasy Almaty oblysyndaǧy şekara beketterınde jüielı jemqorlyq pen kontrabanda jürıp jatqanyn mälımdegen. Tergeu derekterıne sai, bırneşe adamnan tūratyn ūiymdasqan qylmystyq top jyldar boiy keden beketınde zaŋsyz äreketpen ainalysqan. Onyŋ qūramynda qylmystyq orta ökılderımen qatar keibır memlekettık organ qyzmetkerlerı de bolypty. Būl top şekara arqyly tauar tasymalyn kedergısız ötkızu üşın tiıstı lauazymdy tūlǧalarǧa para berıp otyrǧan, osylaişa milliondaǧan dollar zaŋsyz tabys ainalymy qalyptasqan delınedı.
Düisenov dauy Qazaqstannyŋ būrynǧy Bas prokurory, eks-senator Qairat Qojamjarovtyŋ töŋıregındegı serıkterıne qatysty qylmystyq ıstıŋ jalǧasy retınde qabyldandy.
