Almatyda Töle bi köşesınıŋ boiynda būrynnan paidalanylmai tūrǧan tramvai relsterın demontajdau jūmystary jürıp jatyr, dep habarlaidy adyrna ūlttyq portaly Tengrinews.kz-ke sılteme jasap.
Almaty qalasy äkımdıgınıŋ mälımetınşe, atalǧan jūmystar bolaşaq LRT jelısınıŋ qūrylysyna daiyndyq aiasynda jürgızılude. Qazırgı taŋda Töle bi köşesınıŋ Sain köşesınen Ötegen batyr köşesıne deiıngı bölıgınde eskı relster men beton şpaldar alynyp jatyr. Vedomstvo ökılderınıŋ aituynşa, demontajdan şyqqan barlyq materialdar «Almatyelektrotrans» kompaniiasyna berıledı.
Qazır atalǧan aumaqta qūrylys tehnikasy jūmys ıstep, joldyŋ ortalyq bölıgı tolyqtai qūrylys alaŋyna ainalǧan. Jūmysşylar eskı tramvai joldaryn bölşektep, jerdıŋ joǧarǧy qabatyn qazyp jatyr. Soǧan qaramastan, kölık qozǧalysy äzırge şektelmegen.
Eske salaiyq, Almatyda tramvai qozǧalysy 2015 jyly toqtatylǧan bolatyn. Būǧan bırneşe ırı jol apaty sebep boldy. Sol jyly qyrküiek aiynda tejegışı ısten şyqqan tramvai bırneşe kölıkpen soqtyǧysyp, adamdar zardap şekken edı. Arada bırneşe apta ötkende taǧy bır ūqsas apat tırkelıp, osydan keiın qalada tramvai qozǧalysyn tolyq toqtatu turaly şeşım qabyldanǧan.
Keiın Almatynyŋ būrynǧy äkımı Bauyrjan Baibek tramvai jüiesı jabylar kezde qalada nebärı ekı marşrut pen alty tramvai ǧana jūmys ıstegenın aitqan. Onyŋ sözınşe, qoǧamdyq kölıktıŋ būl türıne sūranys az bolǧan.
Al jaŋa LRT jelısınıŋ ūzyndyǧy 18,3 şaqyrym bolady dep josparlanyp otyr. Joba Alatau audanyndaǧy tūrǧyn alaptardy Almaty-2 temırjol vokzalymen bailanystyrady. Baǧyt Bauyrjan Momyşūly köşesı, Töle bi köşesı jäne Abylai han daŋǧyly arqyly ötedı.
Jospar boiynşa, LRT jelısınde ondaǧan stansiia salynyp, ol metro, BRT jäne avtobus baǧyttarymen bırıktırıledı. Qala bilıgı jaŋa jüie Almatydaǧy kölık qozǧalysyn jeŋıldetıp, jolauşylar üşın yŋǧaily orta qalyptastyrady dep esepteidı.
