Astanada ötken qūryltai sezınde «Ädılet» partiiasynyŋ resmi jūmysy bastalyp, ūiym Memleket basşysynyŋ reformalaryn qoldaitynyn mälımdedı.
Astanada «Ädılet» saiasi partiiasynyŋ qūryltai sezı öttı. Jiynǧa elımızdıŋ barlyq öŋırınen myŋǧa juyq delegat pen partiia jaqtastary jinaldy. Qūryltai barysynda jaŋa saiasi bırlestıktı qūru, onyŋ resmi atauyn bekıtu, jarǧysy men baǧdarlamasyn qabyldau, sondai-aq basşylyq jäne baqylau organdaryn sailau mäselelerı qaraldy.
Sez barysynda delegattar «Ädılet» partiiasyn qūru turaly şeşımdı qoldady. Tiıstı şeşımge sezge qatysqan 931 delegat dauys berdı. Sonymen qatar partiianyŋ qazaq, orys jäne aǧylşyn tılderındegı resmi atauy bekıtıldı. Barlyq räsımder «Saiasi partiialar turaly» Qazaqstan Respublikasynyŋ zaŋy talaptaryna säikes öttı.
Qūryltaida partiianyŋ negızgı qūjattary – Jarǧysy men baǧdarlamasy qabyldandy. Jiynnyŋ resmi bölıgı bastalmas būryn qonaqtarǧa arnap şaǧyn konserttık baǧdarlama ūiymdastyrylyp, keiın delegattar jaŋa saiasi ūiymnyŋ aldaǧy baǧyttaryn talqylady.
Sez delegattarynyŋ şeşımımen partiia töraǧasy qyzmetıne Dädebai Aibek Arqabaiūly sailandy. Būǧan deiın qūryltai barysynda jaŋa saiasi bırlestıktıŋ saiasi keŋesınıŋ qūramy tanystyrylǧan bolatyn. Tızımge 30 adam endı.
Sez barysynda qatysuşylar Aibek Dädebaidy partiia töraǧalyǧyna ūsynu turaly ūsynysty qoldady. Öz kezegınde Dädebai delegattarǧa senım bıldırgenı üşın alǧys aityp, būl şeşımdı ülken jauapkerşılık dep qabyldaitynyn jetkızdı.
«Bızdıŋ niettesterımız – däl osyndai azamattar. Olar – belsendı, jauapkerşılıgı joǧary, el damuyna üles qosatyn jandar. Bız bırge eŋbek etemız, jūmysty aşyq, adal ärı qoǧam aldynda esep bere otyryp jürgızemız. Jüielı, jauapty jäne däiektı jūmys jürgızuge uäde beremız», – dep atap öttı Aibek Dädebai.
Qūryltaida partiia jarǧysynyŋ negızgı qaǧidattary da tanystyryldy. Saiasattanuşy Börıhan Nūrmūhamedovtıŋ aituynşa, būl qūjat jai ǧana ışkı ereje emes, partiianyŋ bolaşaqtaǧy jūmys baǧytyn aiqyndaityn maŋyzdy negız.
«Būl – ülken jauapkerşılık sätı. Bızdıŋ partiianyŋ erteŋ qandai bolatyny däl osy kezeŋge bailanysty. Ūsynylǧan qūjat – auqymdy, tereŋ ärı mūqiiat jürgızılgen jūmystyŋ nätijesı. Ol Qazaqstan Respublikasynyŋ Konstitusiiasy men qoldanystaǧy zaŋnamasyna tolyq säikes keledı. Bıraq onyŋ maŋyzy būdan da keŋ. Būl – partiianyŋ saiasi jüienıŋ tolyqqandy qatysuşysyna ainaluyna, azamattardyŋ müddesın qorǧauyna jäne memlekettık saiasattyŋ qalyptasuyna yqpal etuıne mümkındık beretın jūmys qūraly», – dedı ol.
Onyŋ sözınşe, jarǧynyŋ negızınde aşyqtyq, jauapkerşılık jäne azamattardyŋ qatysuy qaǧidattary jatyr. Partiia sezı ūiymnyŋ eŋ joǧary organy retınde belgılenıp, saiasi keŋes pen biuro üzdıksız jūmysty qamtamasyz etetın qūrylymdar retınde qarastyryldy.
Qūryltai sezınde «Ädılet» partiiasynyŋ resmi baǧdarlamasy da bekıtıldı. Qūjatta adami kapitaldy damytu, zaŋ üstemdıgın küşeitu, öŋırlerdıŋ teŋgerımdı damuy jäne ädılettı qoǧam qūru mäselelerı negızgı basymdyq retınde aiqyndalǧan.
Partiia ūstanymynda ädıldık, otanşyldyq, jauapkerşılık, eŋbekqorlyq pen damu basty qūndylyq retınde körsetılgen. Baǧdarlamada densaulyq saqtau, bılım beru, ǧylym, mädeniet jäne kreativtı industriialardy damytu arqyly qoǧam sapasyn arttyruǧa erekşe män berılgen.
Saiasattanuşy Marat Şibūtov qūryltai barysynda partiianyŋ baǧdarlamalyq ūstanymdaryna toqtalyp, ūiym öz jūmysyn ädıldık, jauapkerşılık, naqty äreket pen institusionaldyq qaǧidattarǧa negızdeitının aitty. Onyŋ sözınşe, «Ädılet» partiiasy ädıldık ideologiiasyna jäne jaŋa Konstitusiia qūndylyqtaryna süienedı.
«Eŋ aldymen, baǧdarlamamyzdyŋ erekşelıgıne toqtalǧan jön. «Ädılet» partiiasy özınıŋ ädıldık ideologiiasyna jäne jaŋa Konstitusiia qūndylyqtaryna süienetının airyqşa atap ötedı. Osy arqyly naqty mındettemelerdı öz moinyna alady. Būl degenımız – baǧdarlama bolaşaqtyŋ negızıne ainaluy tiıs qaǧidattarǧa qūrylyp otyr degen söz. Partiianyŋ negızgı tırekterı retınde ädıldık, otanşyldyq, eŋbekqorlyq, jauapkerşılık pen progress aiqyndalǧan», - dep atap öttı saiasattanuşy.
Partiia töraǧasy Aibek Dädebai sezde mälımdeme jasap, jaŋa saiasi bırlestıktıŋ ideologiialyq negızderı men basty baǧyttaryn tanystyrdy. Onyŋ aituynşa, partiia qyzmetı zaŋdylyq, tärtıp jäne qoǧamdyq jauapkerşılık qaǧidattaryna süienedı.
«Bızdıŋ partiiamyzdyŋ negızı zaŋ üstemdıgı men tärtıp qaǧidattaryna qūrylady. Halyqtyŋ zaŋ üstemdıgıne degen senımı – memlekettıŋ basty resursy ärı tıregı. Sondyqtan bızdıŋ negızgı mındetımız – ädıldıktı jariialau ǧana emes, ony ortaq mädenietımızdıŋ ajyramas bölıgıne ärı kündelıktı ömırımızdıŋ şartyna ainaldyru. Basqaşa aitqanda, Ädıldık ūlttyq sana men bolmystyŋ airyqşa sipatyna ainaluǧa tiıs. Memleket basşysy Qasym-Jomart Toqaev öz nazaryn ünemı däl osy baǧytqa audaryp keledı», – dedı Aibek Dädebai.
Ol partiianyŋ negızgı mındetterınıŋ bırı memleket pen azamattar arasyndaǧy senımdı nyǧaitu, dialog pen jauapkerşılıkke negızdelgen saiasi mädeniet qalyptastyru ekenın atap öttı.
Jaŋa saiasi ūiym Memleket basşysynyŋ reformalaryn qoldaitynyn da jariia ettı. Partiia öz jūmysyn zaŋ üstemdıgı men qoǧamdyq tärtıpke, tiımdı memlekettık instituttardy qalyptastyruǧa, öŋırlerdıŋ äleuetın küşeituge jäne «Halyq ünıne qūlaq asatyn memleket» qaǧidatyn ıs jüzınde jüzege asyruǧa negızdemek.
Sonymen qatar ūiym ädılettı ärı bäsekege qabılettı ekonomikany damytuǧa, äleumettık yntymaq pen naqty qoldaudy küşeituge, adami kapitaldy arttyruǧa, sifrlyq memlekettı jetıldıruge, «Taza Qazaqstan» bastamasyn qoldauǧa, jauapty orta derjava qaǧidatyn ūstanuǧa jäne jaŋa geosaiasi etikany qalyptastyruǧa basymdyq beredı.
Partiia ideologiiasynyŋ özegınde Qazaqstannyŋ bolaşaǧy är azamattyŋ bügıngı äreketıne bailanysty degen ūstanym jatyr. Būl – adal eŋbek etu, zaŋdy qūrmetteu jäne qoǧam ömırıne beijai qaramai, el ısıne belsendı aralasu degendı bıldıredı.
«Astana» halyqaralyq qarjy ortalyǧynyŋ basqaruşysy, partiianyŋ jetekşı tobynyŋ müşesı Renat Bektūrov jaŋa saiasi ūiymnyŋ qūndylyqtary men jūmys täsılderıne toqtaldy. Onyŋ aituynşa, «Ädılet» partiiasy özın saiasi teketırestıŋ qūraly retınde qarastyrmaidy jäne basty nazardy öz baǧdarlamalyq maqsattary men ideologiiasyna audarmaq.
Onyŋ sözınşe, partiianyŋ erekşelıgı onyŋ bastamaşylary men qoldauşylarynyŋ buynymen de bailanysty. Bektūrov partiia müşelerınıŋ köpşılıgınıŋ dünietanymy Täuelsız Qazaqstan kezeŋınde qalyptasqanyn atap öttı.
Partiia bastamaşylarynyŋ bırı Talant Omarbekov «Ädılet» partiiasyn qūruǧa 700 adam bastamaşy bolǧanyn aitty. Onyŋ sözınşe, ūiym qūrylǧannan keiın partiianyŋ baǧdarlamasy men jarǧysy äzırlenıp, müşelıkke onlain tırkeluge mümkındık beretın arnaiy sifrlyq platforma ıske qosylǧan.
Sondai-aq qysqa uaqyt ışınde partiiaǧa 9 myŋnan astam adamnyŋ tırkelgenı aityldy. Bastamaşyl top ökılınıŋ pıkırınşe, partiiaǧa qyzyǧuşylyq tanytyp otyrǧandardyŋ basym bölıgı – jastar.
«Jastarǧa äleumettık lift pen jaŋa özgerıster qajet. Qazır saiasatqa aralasatyn uaqyt kelgenın jastardyŋ özı de tüsınıp otyr», – dedı ol.
