Bolat Nazarbaevtyŋ ūly, käsıpker Nūrbol Nazarbaev qaitadan özın bankrot dep tanu jönınde ötınış berdı, dep habarlaidy «Adyrna» tılşısı tengrinews.kz-ke sılteme jasap.
17 aqpanda sot ötınıştı qabyldap, "sot arqyly bankrottyq räsımın qoldanu turaly" azamattyq ıs qozǧaǧan. Qazırgı taŋda ol memleketke kem degende 63 mlrd teŋge qaryz.
Istı sotqa daiyndau aiasynda Nūrbol Nazarbaev 2026 jylǧy 3 nauryzda saǧat 15:10-da «äŋgımelesuge» şaqyrylady. Iske üşınşı tarap retınde Almaty oblysynyŋ Memlekettık kırıster departamentı tartylǧan.
Nūrbol Nazarbaevtyŋ atqaruşylyq öndırıs boiynşa kemınde ekı bereşegı bar: 61 854 480 596teŋge. Onyŋ ışınde 55 mlrd teŋgenı memleket kırısıne - arnaiy qor esebıne audaryluǧa tiıs.
Naqtylap keteiık, arnaiy memlekettık qor zaŋsyz alynǧan dep tanylyp, memleketke qaitarylǧan aktivter esebınen tolyqtyrylady. Oǧan qarajatty aktivterdı qaitarumen ainalysatyn uäkılettı organdar, sottar, sondai-aq, sot şeşımderın oryndaǧan jeke jäne zaŋdy tūlǧalar audarady. Ekınşı bereşek - 1,6 mlrd teŋge kölemındegı memlekettık baj (ol da memleket kırısıne tölenuı kerek).
Jalpy qaryzy 63,7 mlrd teŋgege jetedı. Qaryz esepten şyǧaryluy üşın bereşek 5,5 mln teŋgeden (1600 AEK) köp boluy jäne boryşkerdıŋ belgılı bır mülkı boluy kerek. Sot bankrottyǧynyŋ mänı mynadai: boryşkerdıŋ qolyndaǧy mülık (päter, kölık, biznes, qūndy zattar jäne t.b.) satylyp, tüsken qarajat kreditorlarǧa qaryz kölemıne qarai bölınedı. Eger mülık jetkılıksız bolsa, qaryz tolyq jabylmauy mümkın.
Barlyq bölu räsımı aiaqtalǧannan keiın sot adamdy bankrot dep tanyp, qalǧan qaryzdyŋ qaldyǧyn esepten şyǧara alady. Eger Nazarbaev bankrot atansa, oǧan:
- 5 jyl nesie aluǧa tyiym salynady;
- 3 jyl boiy qarjy jaǧdaiy baqylauda bolady;
- qaita bankrot boluǧa tek 7 jyldan keiın qūqyly bolady.
Nazarbaevtyŋ bankrottyqqa qatysty talpynystary 2025 jyldyŋ küzınen bastalǧan. Byltyr qyrküiekte sot ūqsas ıstı qabyldaǧanymen, keiın qarausyz qaldyrǧan.
"2025 jylǧy 19 qaraşadaǧy ūiǧarymmen Nazarbaev Nūrbol Bolatūlynyŋ tölem qabıletın qalpyna keltıru räsımın qoldanu turaly ötınışı qarausyz qaldyryldy", - delıngen sottyŋ resmi sūrauǧa bergen jauabynda.
Ol būl qaulyny joiu üşın qaita şaǧymdanǧanymen, odan da bas tartylǧan. Demek, qazırgı ötınış - onyŋ bankrottyqty moiyndatuǧa üşınşı äreketı.
