Qazaqstannyŋ Mädeniet jäne aqparat ministrı Aida Balaeva jurnalist Botagöz Omarovanyŋ ūstaluyna bailanysty resmi mälımdeme jasady, dep habarlaidy "Adyrna".
Ministr būl mäselenıŋ vedomstvo baqylauynda ekenın atap öttı.
Aida Balaeva öz jazbasynda kez kelgen qūqyqtyq mäselede «Zaŋ jäne tärtıp» qaǧidaty qataŋ saqtaluy tiıs ekenın erekşe atap öttı. Onyŋ aituynşa, zaŋ barşaǧa ortaq jäne barlyq prosessualdyq äreketter syrtqy aralasusyz, tek belgılengen tärtıppen jüzege asyryluy qajet.
«Mūndai jaǧdailarda zaŋda közdelgen barlyq räsımder aiaqtalǧanǧa deiın asyǧys tüsındıru jūmystaryn jasauǧa, dälelsız qorytyndylar şyǧaruǧa jäne aldyn ala baǧa beruge jol beruge bolmaidy», – dedı ministr
Ministr öz sözınde jaqynda qabyldanǧan «Mass-media turaly» zaŋnyŋ talaptaryna da toqtaldy. Ol aqparattyŋ dūrystyǧyn tekseru – ärbır jurnalistıŋ tıkelei mındetı ekenın eske saldy.
Sonymen qatar, zaŋnamada (68-bap) jurnalisterdı jauapkerşılıkten bosatatyn jaǧdailar da qarastyrylǧan. Mysaly, eger aqparat resmi sözderden özgerıssız, sözbe-söz keltırılgen bolsa, jurnalist jalǧan aqparat taratqany üşın jauapqa tartylmaidy.
Aida Balaeva atalǧan ıs boiynşa şeşımnıŋ ädıl bolatynyna senım bıldırdı. Ministrlık jaǧdaidy mūqiiat baqylap otyr jäne qajet bolǧan jaǧdaida öz qūzyretı aiasynda şaralar qabyldauǧa daiyn ekenın jetkızdı.
Ministr oqiǧanyŋ mänın būrmalau nemese prosess qatysuşylaryn negızsız qaralauǧa äkeluı mümkın mälımdemelerden aulaq boluǧa şaqyrdy.
Aita keteiık, būǧan deiın sot jurnalist Botagöz Omarovaǧa qatysty būltartpau şarasyn taŋdap, ony ekı ai merzımge üiqamaqqa alǧanyn habarladyq.
Mälımetke säikes, jurnalist Jäniia Ūranqaeva būl jaŋalyqty özınıŋ äleumettık jelıdegı paraqşasynda jariialaǧan. Onyŋ aituynşa, Omarovanyŋ tūrǧylyqty mekenjaiynda tıntu jūmystary jürgızıledı.
Qazırgı uaqytta ıs boiynşa tergeu amaldary jalǧasyp jatyr.
Al 21 nauryzda bır top qazaqstandyq jurnalist prezident Qasym-Jomart Toqaevqa qarata mälımdeme jasap, jurnalist Botagöz Omarovanyŋ ısın jeke baqylauyna aludy sūraǧan. Būǧan qosa, mälımdemede jalǧan aqparat taratu babyn Qylmystyq kodeksten alyp tastau jaily aitylǧan.
“Sızden Botagöz Omarovanyŋ ısın jeke baqylauǧa aluyŋyzdy jäne bızdı, jurnalisterdı, osyndai oqiǧalardan qorǧauyŋyzdy sūraimyz, sebebı Qylmystyq kodekstıŋ 274-baby köbınese jurnalisterge qysym jasau qūraly retınde qoldanylady. Konstitusiianyŋ garanty retınde sızden osy bapty dekriminalizasiialau turaly prezidenttık bastama köteruıŋızdı sūraimyz,-” degen videomälımdeme jurnalister.
