Jetısulyq jastar bügıngı referendumda özderınıŋ azamattyq ūstanymyn tanytyp, dauys berude. Sonyŋ ışınde arnaiy orta jäne joǧary oqu oryndarynyŋ studentterın, jas mamandardy, belsendı jastardy erekşe atauǧa bolady.
Mäselen, Iliias Jansügırov atyndaǧy Jetısu universitetınıŋ student jastary men ūjymy –jalpy sany 100-den astam adam dauys beru uchaskesıne ūlttyq kiımmen keldı. Būl qazaq halqynyŋ dästürıne, mädenietı men ruhani qūndylyqtaryna degen qūrmettıŋ jarqyn körınısı ärı bırlık pen azamattyq jauapkerşılıktıŋ simvolyndai boldy.
Al Aqsu audanynda referendum uchaskesıne Qapal käsıptık-tehnikalyq kolledjınıŋ 250 studentı bırge kelıp, öz taŋdauyn bıldırdı. Jas buyn ökılderınıŋ ūiymdasqan türde dauys beruı olardyŋ el taǧdyryna beijai qaramaitynyn, jastardyŋ boiynda qoǧam ömırıne degen jauapkerşılık sezımınıŋ qalyptasqanyn aiǧaqtady.
- Bız täuelsız eldıŋ jastary retınde memleketımızdıŋ bolaşaǧyna beijai qarai almaimyz. Sondyqtan bügın barlyǧymyz bırge kelıp, öz taŋdauymyzdy jasadyq. Būl – bızdıŋ elge degen qūrmetımız, bolaşaǧymyzǧa degen jauapkerşılıgımız, – dedı Qapal käsıptık-tehnikalyq kolledjınıŋ studentı Jansaia Jamalbek.
Sol siiaqty Köksu politehnikalyq kolledjınıŋ studentterı men ūjymy qataryndaǧy 200 adam, Tekelı käsıptık kolledjınıŋ 45 studentı referendumda belsendılık tanytty.
Būdan bölek öŋırdegı jastar ūiymdarynyŋ ökılderı, jas mamandar jäne basqa da belsendı jastar azamattyq pozisiiasyn aiqyn tanytyp, dauys beruge belsene qatysty. Osylaişa jastar memlekettıŋ bolaşaǧyna degen senımın aiqyn tanytyp, qoǧamdyq-saiasi üderısterdıŋ maŋyzdylyǧyn tüsınetının körsettı.
Atap ötsek, Ortalyq sailau komissiiasynyŋ saǧat 18.00-degı mälımetı boiynşa oblys sailauşylarynyŋ 73,84 % dauys bergen.
