Almaty Memlekettik qýyrshaq teatry Kanada memleketi Ottava qalasynda ótken I-shi Halyqaralyq «Ottava» qýyrshaq teatrlar festıvaline tuńǵysh ret qatysyp, «Romeo men Djýletta» qoıylymy úshin Gran-Prı júldesine ıe boldy!
Soltústik Amerıka materıgininde ornalasqan, jer aýmaǵy boıynsha dúnıejúzi elderi arasynda ekinshi orynda ornalasqan, tabıǵaty men mádenıeti kúlli álem boıynsha kóptegen adamdardy qyzyqtyratyn Kanada memleketiniń astanasy Ottava qalasynda tuńǵysh ret I-shi Halyqaralyq «Ottava» qýyrshaq teatrlar festıvali jazdyń shýaqty da kórikti shilde aıynda ótkizildi. Kanadalyq kórermenderge dúnıejúziniń qýyrshaq ónerlerin tanystyryp, halyqaralyq shyǵarmashylyq pen yntymaqtastyqty kózdegen mádenı is-sharaǵa elimizdiń kók týyn ustap qatysqan alǵashqy qazaqstandyq óner órdasy Almaty Memlekettik qýyrshaq teatry boldy. Atalmysh teatrdyń shyǵarmashylyq ujymy festıval aıasynda kanadalyq kórermenderdiń nazaryna óz repertýaryndaǵy erekshe qoıylymdardyń biri, aǵylshyn dramatýrgy Ýılıam Shekspırdiń áıgili tragedııasy jelisimen sahnalanǵan, názik te taza mahabbattyń qudiretin sezdiretin «Romeo men Djýletta» spektaklin usyndy.
Qýyrshaq teatrynyń repertýaryndaǵy «Romeo men Djýletta» spektakli 2019 jyly belgili rejısser Dına Jumabaevanyń jetekshiligimen jaryqqa shyqty. Eresekterge arnalǵan bul qoıylym óziniń erekshe qýyrshaqtarymen jáne sahnalyq sheshimderimen premerasy ótkizilgen kezden bastap kópshilik kórermender men teatr synshylarynyń joǵarǵy baǵasyn ıelengen edi. Birtalaı halyqaralyq jáne respýblıkalyq deńgeıdegi teatr festıvalderinde de baq synap, bul qoıylym qýyrshaq teatrynyń abyroıyn asqaqtatqan. Mysaly, 2022 jyly atalmysh spektakl Bolgarııa Respýblıkasy Varna qalasynda ótken halyqaralyq «Altyn delfın» qýyrshaq teatrlar festıvalinde úzdik dep tanylyp «Gran-prı» júldesine, «Eń úzdik er adam» júldesine, «Eń úzdik debıýt» júldesine laıyqty bolǵan. Al oǵan deıin 2021 jyly Qaraǵandy qalasynda ótkizilgen jáne kóbine otandyq dramalyq teatr ujymdary qatysqan Áshirbek Syǵaı atyndaǵy «Syn – shyn bolsyn» respýblıkalyq teatrlar festıvalinde I-shi oryndy jeńip alǵan. Sonymen qatar «Romeo men Djýlettanyń» ózge de festıvaldik jetistikteri men jeńisteri jetip jatyr.
Kórkemdik deńgeıiniń joǵary bolýyna baılanysty kanadalyq kórermen nazaryna usynǵan bul qoıylym memleket astanasynyń ortalyǵynda ornalasqan Ottava Ýnıversıtetiniń «Academic Hall» sahnasynda 3-i jáne 4-shi shilde kúnderi sahnalandy. Kanadalyq azamattar da, atalmysh elde turyp jatqan otandastarymyz ben qandastarymyz da spektakldi tamashalap, zor qoshemet pen jyly lebizderin bildirdi.
Qazaqstan Respýblıkasynyń Kanadadaǵy Tótenshe jáne Ókiletti Elshisi Dáýletbek Qusaıynov festıval aıasynda qýyrshaq teatryna qoldaý bildirip, «Romeo men Djýletta» spektaklin tamashalap: «Bizdiń jastar óte joǵary deńgeıde jumys kórsetti jáne óte qyzyq mahabbat hıkaıasyn sezindirdi. Óz daryndaryn, jalpy qazaq jastaryna tán talantty Kanada halqyna tanystyrdy», – dep baǵalap ótti.
Al Kanadanyń Qazaqstan Respýblıkasyndaǵy Tótenshe jáne Ókiletti Elshisi Alan Hamson bolsa: «Artısterdiń tamasha ónerine kýá boldym. «Romeo men Djýlettanyń» osy bir ınterprıtaııasy bizdi qatty tańǵaldyrdy!», – dep pikir bildirdi.
Festıval sońynda Almaty Memlekettik qýyrshaq teatrynyń «Romeo men Djýletta» spektakli eń úzdik ári eń tabysty dep tanylyp, «Gran-Prı» júldesine ıe boldy. I-shi Halyqaralyq «Ottava» qýyrshaq teatrlar festıvali aıasynda qýyrshaq teatrynyń artısteri qazaq qýyrshaq óneriniń, qazaq teatry óneriniń, jalpy qazaq halqynyń ónerliligin sahna tórinde asqaqtatyp, zor shabytqa keneldi.
