Qazaqstan Qyrǧyzstan aumaǧyndaǧy bırqatar nysandar men jer telımderın ūzaq merzımge jalǧa alady, dep habarlaidy “Adyrna" ūlttyq portaly.
Tiıstı kelısımder men şarttardy Senat deputattary ratifikasiialady.
Ratifikasiialanǧan qūjattardyŋ bırı – Qazaqstan men Qyrǧyzstan ükımetterı arasyndaǧy Ystyqköl oblysyndaǧy kurort-sauyqtyru nysandaryna menşık qūqyǧyn retteu turaly kelısım. Qūjatqa säikes, Qazaqstan tarapyna tiesılı nysandar (baza obektısınen basqa) 2029 jyldyŋ soŋyna deiın jyl boiy jūmys ısteitın 3 jäne 4 jūldyzdy qonaqüi deŋgeiıne deiın jaŋǧyrtyluy tiıs.
Atalǧan kelısımge 2006 jylǧy 4 şıldede qol qoiylǧan.
Senat deputaty Nūriia Niiazovanyŋ aituynşa, kelısım aiasynda Qazaqstan investorlar tartuǧa, berılgen aumaqtaǧy eskı nysandardy būzuǧa qūqyly.
Qūjat Qazaqstannyŋ tört nysanǧa menşık qūqyǧyn bekıtedı. Olar «Qazaqstan» sanatoriiı, «Samal» demalys üiı, «Universitet» sport-sauyqtyru lagerı jäne «Olimp» sport-sauyqtyru ortalyqtary bolyp tūr.
Qazırgı uaqytta Prezident Is basqarmasy Ystyqköl jaǧalauynda «Qazaqstan» sanatoriiın salu boiynşa investisiialyq jobany jüzege asyryp jatyr.
Nysandy paidalanuǧa beru 2026 jyldyŋ törtınşı toqsanyna josparlanǧan. Joba aiasynda sanatorii aumaǧyndaǧy barlyq ǧimarattardy būzu közdelgen. Tek Dınmūhamed Qonaevtyŋ №1 saiajaiy tarihi-mädeni mūra nysany retınde saqtalyp, üi-muzeige ainaldyrylmaq.
Sonymen qatar Senat Qazaqstan men Qyrǧyzstan ükımetterı arasyndaǧy 2009 jylǧy 1 jeltoqsandaǧy jer telımderın jalǧa beru turaly şartty da ratifikasiialady. Qūjatqa säikes, jalpy aumaǧy 58,8 gektar jer telımı Qazaqstanǧa 49 jyl merzımge uaqytşa aqyly paidalanuǧa berıledı.
Qyrǧyz tarapy jalǧa berılgen nysandardyŋ qol sūǧylmauyna kepıldık berıp, olardy memlekettık menşıkke alyp qoiuǧa baǧyttalǧan äreketterden bas tartuǧa mındettenedı.
