Qazaqstan Respublikasynyŋ Syrtqy ıster ministrı Ermek Köşerbaevtyŋ Vaşingtonǧa sapary aiasynda AQŞ Memlekettık hatşysynyŋ bırınşı orynbasary Kristofer Landaumen kezdesuı öttı.
Kelıssözder barysynda taraptar ekıjaqty kün tärtıbındegı özektı mäselelerdıŋ keŋ auqymyn, onyŋ ışınde saiasi jäne ekonomikalyq özara ıs-qimyldy, sauda men investisiialardy damytu, energetika jäne asa maŋyzdy mineraldar salasyndaǧy yntymaqtastyqty talqylady, sondai-aq öŋırlık jäne jahandyq qauıpsızdık mäselelerı boiynşa pıkır almasty.
Taraptar Qazaqstan men AQŞ arasyndaǧy Keŋeitılgen strategiialyq serıktestıktı odan ärı damytuǧa beiıldılıgın rastady. Beibıtşılık keŋesın qūru jönındegı amerikandyq bastamasyna jäne osy formatqa Qazaqstannyŋ qūryltaişy el retınde qatysuyna erekşe nazar audaryldy. Būǧan qosa, 2026 jylǧy jeltoqsanda Maiami qalasynda ötetın G20 sammitıne Qazaqstannyŋ qatysuyna daiyndyq mäselelerı talqylandy.
Ministr eldıŋ energiia resurstary men asa maŋyzdy mineraldardyŋ jahandyq jetkızu tızbekterınıŋ tūraqtylyǧyn qamtamasyz etudegı strategiialyq rölın atap ötıp, būl saladaǧy yntymaqtastyqty AQŞ-pen özara ıs-qimyldyŋ negızgı baǧyttarynyŋ bırı retınde körsettı.
Öz kezegınde, AQŞ diplomaty Qazaqstandy Ortalyq Aziiadaǧy jäne halyqaralyq arenadaǧy senımdı serıktes retınde atap ötıp, aldaǧy bailanystar ekıjaqty qatynastar men praktikalyq yntymaqtastyqty damytuǧa qosymşa serpın beretınıne senım bıldırdı.
Kelıssözder barysynda QR Prezidentı Qasym-Jomart Toqaevtyŋ Vaşingtonǧa sapary men «S5+1» sammitınıŋ qorytyndysy boiynşa şamamen 17 mlrd AQŞ dollaryn qūraityn būryn qol jetkızılgen kelısımder men investisiialyq jobalardy ıske asyru mäselelerıne erekşe köŋıl bölındı.
Kezdesu qorytyndysy boiynşa taraptar qoldanystaǧy yntymaqtastyq formattary aiasynda, sondai-aq jaŋa tetıkter men bastamalardy ıske qosu arqyly ekıjaqty özara ıs-qimyldy nyǧaituǧa uaǧdalasty.
