25 jastaǧy IT-äzırleuşı Aleksandr Kachkurkin Qazaqstannan Reseige deportasiialandy. Elge kelgen boida ol ūşaqtyŋ ışınde ūstalyp, memleketke opasyzdyq jasau baby boiynşa qamauǧa alyndy. Būl turaly «Pervyi otdel» qūqyq qorǧau jobasy jazdy, dep habarlaidy «Adyrna» tılşısı.
Kachkurkin Qyrymda tuyp-ösken. 2014 jyly 14 jasynda Resei azamattyǧyn alǧan. Qazaqstanǧa saiasi sebeptermen köşıp kelgen. Soŋǧy jyldary Almatyda tūryp, DevOps-injener jäne äzırleuşı bolyp jūmys ıstegen. Onyŋ tapsyrys beruşılerınıŋ arasynda OpenAI atty amerikalyq kompaniia da bolǧan.
28 qaŋtarda Kachkurkinge bırden ekı äkımşılık qūqyqbūzuşylyq boiynşa ıs qozǧalǧan. Olar – joldy belgılenbegen jerden kesıp ötu jäne jabyq ǧimaratta kalian şegu.
«Qūqyq qorǧauşylardyŋ aituynşa, būl hattamalardyŋ ekeuı de qoldan jasalǧan. Osydan keiın polisiia sotqa jügınıp, Kachkurkindı «Qazaqstan Respublikasynyŋ zaŋdary men egemendıgın qūrmettemeuıne bailanysty» deportasiialaudy talap etken. Barlyq prosess bırneşe saǧattyŋ ışınde jüzege asqan. Ädette mūndai räsımder aptalap, tıptı ailap sozylady. Kachkurkin şūǧyl türde Reseige jıberılgen. Ūşaq qonǧan sätte ony bırden ūstap, sotqa jetkızgen. Sot jas jıgıttı qamauda ūstau turaly şeşım şyǧarǧan»,-delıngen habarlamada.
Reseide oǧan Ukrainaǧa aqşa audardy degen aiyppen memleketke opasyzdyq jasady degen kınä taǧylyp otyr. RF QK-nıŋ 275-babyna säikes, Kachkurkin 12 jyldan 20 jylǧa deiın bas bostandyǧynan aiyryluy nemese ömır boiyna sottaluy mümkın.
Eske salaiyq, 30 qaŋtarda Qazaqstannyŋ Reseige şeşen belsendısı Mansur Movlaevty da deportasiialaudy josparlap otyrǧany belgılı boldy. Qazırgı uaqytta ol Almatydaǧy tergeu izoliatorynda otyr. Ötken jyldyŋ jeltoqsanynda Qazaqstan bilıgı oǧan bosqyn märtebesın beruden bas tartqan edı.
Movlaev Şeşenstan basşysy Ramzan Qadyrovty qataŋ synauymen, sondai-aq adam qūqyqtarynyŋ būzyluy men saiasi quǧyn-sürgınderge qarsy mälımdemelerımen tanymal boldy. Ol Reseide esırtkınıŋ zaŋsyz ainalymy ısı boiynşa bırneşe jyl türmede otyrǧan. Bostandyqqa şyqqan soŋ elden ketıp, aldymen Qyrǧyzstandy, keiın Qazaqstandy panalaǧan. 2025 jyldyŋ mamyrynda RF sūrauy boiynşa Qazaqstanda ūstalǧan. Reseide oǧan ekstremizmdı qarjylandyrdy degen aiyp taǧylyp, federaldyq ızdeu jariialanǧan.
