Qaraǧandy oblysynda balalar men jasöspırımder arasyndaǧy suisidtıŋ aldyn alu baǧytyndaǧy täsılder jaŋartyluda. Öŋır prokuraturasynyŋ bastamasymen arnaiy algoritm äzırlenıp, būl özektı äleumettık mäsele oblys äkımdıgınde ötken vedomstvoaralyq komissiianyŋ otyrysynda jan-jaqty talqylandy.
Jaŋa şaralar täuekelderdı erte kezeŋde anyqtauǧa, psihologiialyq kömektıŋ qoljetımdılıgın arttyruǧa jäne bılım beru ūiymdary, ata-analar men salalyq mamandar arasyndaǧy özara ıs-qimyldy küşeituge baǧyttalǧan. Bastama «Zaŋ jäne tärtıp» ideologemasy aiasynda ıske asyryluda, mūnda adam ömırın saqtau men qauıpsızdıktı qamtamasyz etu sözsız basymdyq retınde aiqyndalǧan.
– Oblystyŋ mektepterı men kolledjderınde balalardyŋ ömırı men psihologiialyq saulyǧyn qorǧauǧa baǧyttalǧan arnaiy algoritm engızıldı. Ol pedagogterge oquşylardyŋ mınez-qūlqyndaǧy alaŋdatatyn belgılerdı der kezınde baiqauǧa jäne olarǧa dūrys äreket etuge mümkındık beredı. Algoritm täuekel tuyndaǧan jaǧdaida synyp jetekşılerınıŋ, kuratorlardyŋ, bılım beru ūiymdary äkımşılıgınıŋ jäne mektep psihologtarynyŋ ıs-qimyl tärtıbın naqty belgıleidı. Onyŋ negızınde problemalardy erte anyqtau, balaǧa mūqiiat közqaras, qūpiialylyqty saqtau jäne äreketsızdıkke jol bermeu qaǧidattary jatyr, – dedı Qaraǧandy oblysy prokurorynyŋ aǧa kömekşısı Aijan Orazbekova.
Balalar öz qorqynyşy men jan düniesındegı küizelıstı jalǧyz ötkermeuı tiıs. Qaiǧyly jaǧdailarǧa alyp keletın negızgı sebepterdıŋ qatarynda ata-ana nazarynsyz qalu, otbasyndaǧy tūraqsyz ahual, jalǧyzdyq sezımı, alǧaşqy mahabbaty bırjaqty bolsa, sondai-aq jaqyn adamynan aiyrylu sekıldı auyr psihologiialyq faktorlar bar.
Qazırgı uaqytta mektepterde «Köŋıl küi kündelıgı» engızılıp, mobildı qosymşalar arqyly täuekel belgılerın der kezınde anyqtau jūmystary jürgızılude. Psihikalyq qoldau ortalyǧy mamandarǧa arnalǧan moduldık oqytu baǧdarlamasyn äzırledı, onda är balaǧa jeke közqaras qalyptastyruǧa basymdyq berılgen. Būl kürdelı jaǧdailarda tiımdı şeşım qabyldauǧa jäne balalardy özın-özı qorǧau daǧdylaryna üiretuge mümkındık beredı.
Äleumettık tūrǧydan osal sanattaǧy, tūrmysy tömen otbasylardan şyqqan jäne profilaktikalyq esepte tūrǧan 23 myŋnan astam oquşy tūraqty patronajben qamtylǧan.
Bılım basqarmasynyŋ basşysy Dulat Jekebaev pedagog-psihologtar tapşylyǧy mäselesınıŋ kezeŋ-kezeŋımen şeşılıp jatqanyn atap öttı.
Osy maqsatta E. Böketov atyndaǧy Qaraǧandy ūlttyq zertteu universitetımen memorandum jasalǧan. Sonymen qatar mamandar oblys äkımı granttary esebınen daiarlanuda. Qazırgı taŋda ortalyq deŋgeide pedagog-psihologtardyŋ jalaqysyn arttyru mäselesı pysyqtaluda.
Vedomstvoaralyq komissiia otyrysynda «Qūqyq būzuşylyqtardyŋ aldyn alu turaly» jaŋa zaŋnyŋ negızgı normalary da tüsındırıldı.
– Oŋ nätijeler bar, alaida mäsele älı de özektı küiınde qalyp otyr. Barlyǧymyz algoritmge säikes bırlesıp jūmys ısteuımız qajet. Balalardyŋ qūqyqtaryn qorǧau jönındegı jeke basqarma qūru mäselesın pysyqtaudy tapsyramyn. Täuekel aimaǧyndaǧy ärbır bala üşın bärımız jeke jauapkerşılık arqalaimyz. Özara ıs-qimyldy naqty jolǧa qoiyp, qosymşa şaralar qabyldau qajet, – dedı oblys äkımı Ermaǧanbet Bölekpaev.
