Memleket basşysy Qasym-Jomart Toqaevtyŋ «Turkistan» gazetıne bergen keŋ kölemdı sūhbaty jariialandy, dep habarlaidy «Adyrna» tılşısı.
Äŋgımelesu barysynda prezident 2025 jyly bolǧan oqiǧalarǧa toqtaldy.
«Şynymen de, aituly oqiǧalar az bolǧan joq. Közdı aşyp-jūmǧanşa bır jyl öte şyqty, būl sūraǧyŋyzǧa taban astynda jauap bere qoiu qiyn. Mysaly, ekonomikamyz 6 paiyzdan astam östı. Işkı jalpy önım 300 milliard dollar mejesıne jetıp, jan basyna şaqqanda 15 myŋ dollardan asty. Būl – elımızben qatar, bükıl öŋır üşın rekordtyq körsetkış. Jalpy, oidaǧydai jūmys ısteldı deuge bolady. Bıraq, men barlyq memlekettık qyzmetşılerge toqmeiılsıp, masairap otyruǧa mülde bolmaitynyn ünemı aitamyn. Şyǧys halyqtary «Tegıs joldyŋ özınde tosqauyl bar» deidı. Bız tynymsyz eŋbektenıp, tek alǧa ūmtyluymyz kerek. Onyŋ üstıne, tüiını tarqatylmaǧan tüitkılder az emes.
Būl – eŋ aldymen, infliasiia deŋgeiınıŋ joǧary boluy. Sonyŋ saldarynan azamattarymyzdyŋ äl-auqatyn arttyruǧa arnalǧan eŋbektıŋ bärı tekke ketıp jatyr. Biyl Ükımet pen äkımder memleketımızdıŋ äleumettık-ekonomikalyq tūǧyryn nyǧaitu üşın köp jūmys ısteuı kerek»,-dedı ol.
Aituynşa, elımızdıŋ reformalardy jüzege asyruǧa bırjola bet būrǧanyn ötken jyldyŋ basty qorytyndysy deuge bolady.
«Qazaqstan jaŋǧyru jolynda qaryşty qadam basyp, barynşa örkeniettı el bola bastady. Qoǧamda öskeleŋ ūrpaqtyŋ jarqyn bolaşaǧy üşın tübegeilı özgerıs jasau asa maŋyzdy ekenı turaly naqty tüsınık qalyptasty.
AQŞ prezidentı Tramptyŋ «aqylǧa syiymdy oi» strategiiasynyŋ yqpalymen jahandanu üderısı keiınge ysyryla bastady. Bız de Qazaqstanda ädıldık, zaŋ men tärtıp, eŋbekqorlyq siiaqty memleketımızdıŋ bolaşaǧy üşın airyqşa maŋyzdy qaǧidattarǧa negızdelgen qoǧam qūryp jatyrmyz. Ūzaq merzımge arnalǧan nätijege jetu üşın būl jūmys jaŋa jylda ekı ese tyŋ qarqynmen jalǧasyn tabady»,-dedı prezident.
Qasym-Jomart Toqaev Jaŋa jyl qarsaŋynda Kremlde Tūŋǧyş prezident Nūrsūltan Nazarbaevtyŋ Resei basşysymen taǧy da kezdesuıne bailanysty pıkır bıldırdı.
«Tūraqty türde ötkızılıp jürgen kezdesuler beiresmi sipatqa ie. Mūny Resei prezidentınıŋ özı de atap ötedı. Taiauda ötken Sankt-Peterburgtegı basqosuda Vladimir Putin maǧan Nūrsūltan Nazarbaevty onyŋ ötınıp sūrauy boiynşa qabyldaitynyn aitqan edı. Resei prezidentınıŋ erekşelıgı: ol dostarymen jäne ärıptesterımen jyly qarym-qatynas qūra bıledı. Jūmysy öte qarbalas bolsa da, senbı künı Qazaqstannyŋ Tūŋǧyş prezidentımen asyqpai äŋgımelesuge uaqytyn böldı. Ol Nūrsūltan Nazarbaevty Euraziiadaǧy yqpaldastyq üderısınıŋ bastauynda tūrǧan täjıribelı saiasatker retınde baǧalaidy. Resei būl üderıste jetekşı röl atqaryp otyr. Kremldegı kezdesu Vladimir Putinnıŋ adamgerşılıgı joǧary ekenın körsetedı. Ondai äŋgımeler barysynda ne aitylǧany maǧan qyzyq emes, būl turaly eşqaşan sūraq qoimaimyn.
Al, Nūrsūltan Nazarbaevtyŋ jeke basyna keler bolsaq, men ony qazırgı qazaq memlekettıgınıŋ negızın qalaǧan tūlǧa dep sanaitynymdy bırneşe ret aittym. Onyŋ memlekettık instituttardy jäne ekonomikanyŋ naryqtyq tetıkterın qūru, jaŋa astanamyzdy salu jolyndaǧy eŋbegın bärı bıledı. Özıŋızge mälım, bız Qazaqstandy Ädıldık, Zaŋ jäne Tärtıp ornaǧan el etkımız keledı. Sondyqtan, eşkımdı alalamai, är azamattyŋ eŋbegın ädıl baǧalau kerek. Būl elımızdıŋ Tūŋǧyş prezidentı Nūrsūltan Nazarbaevqa da qatysty»,-dedı memleket basşysy.
Prezidentke bilık tranzitı turaly da sūraq qoiyldy.
«Būl jönınde söz qozǧauǧa älı erte, aldymyzda tabandy jūmysqa toly bırneşe jyl bar»,-dep jauap berdı Toqaev.
