Bir aptada eki músin jasaǵan jaýynger

2518
Adyrna.kz Telegram

Óskemen garnızonyndaǵy oqý-jattyǵý polıgonynyń bastyǵy kapıtan  Raı Orazbekov qolóner sheberi retinde qalyń jurtqa tanymal. Zaısan qalasynyń týmasy oqýshy kezinen sýretke beıim edi.  Ol Almaty qalasyndaǵy  Qurlyq  áskerleriniń áskerı ınstıtýtynyń kýrsanty atanǵan shaǵynda da boıyndaǵy ónerin joǵaltpady. Kerisinshe damytyp,  sýret salýdan bólek, músin jasaýǵa mashyqtandy. Alaıda, bilim ordasynda shyǵystyń shymyry bul qasıetimen tanyla qoımady.

2019 jyly Gvardeısk garnızonynyń 30212 áskerı bóliminen  Óskemen qalasyndaǵy 27943 áskerı bólimine aýysqan shaqta ǵana talanty tóbe tanytady. Óńirlik qolbasshylyqtan árbir áskerı bólimge qalashyqta qardan músin jasańdar degen tapsyrma beriledi. Qarýlastar qatarynda óz jumysyn aıaqtap bolǵan Raıdyń týyndysyn tekserýshi top  baqylaıdy. Arnaıy top ishinde  27943 áskerı bóliminiń komandıri polkovnık  Erjan Meıirmanov bar bolatyn. Ol Raıdyń qardan jasalǵan músinin kórip ań-tań bolady. Raıdyń aıtýynsha, osy sátten bastap áskerı bólimdegiler de onyń turǵyzǵan qarsulbasyna tańyrqap, «sen áskerı qyzmetker emes, naǵyz músinshi bolatyn adamsyń ǵoı» degen kórinedi.

- Araǵa kún sýytpaı áskerı bólim komandıri ózine shaqyryp, músindi qardan emes, basqa da uzaq saqtalatyn qatty zattardan jasap kórýimdi surap, usynys bildirdi. Áskerı bólim Qasym Qaısenov esimimen atalǵan soń, maǵan qazaq batyrynyń bıýstin turǵyzý qajet edi. Bul meniń ómirimdegi asa úlken jaýapkershilikke toly sátterdiń biri boldy. Sebebi qardan jasalǵan músin kún jylyǵanda erip ketetin, al endigi kirisetin týyndym erip ketpeıdi, ámbe áskerı bólimniń kórikti jerine qoıylmaq.  Bir apta bolmaı  men Qasym Qaısenovtiń bir emes, eki músinin jasap shyǵardym, – deıdi 27943 áskerı bólimi oqý-jattyǵý polıgonynyń bastyǵy kapıtan Raı Orazbekov.

Komandıri sheberhanaǵa kelip,  onyń  músin jasaýdaǵy sheberligine kóńili tolyp, taǵy da bireý kerek deıdi. Bir músinge bir-eki aı  ýaqyt jumsalǵan. Al áskerı qyzmette tapsyrma jedel ári  buljytpaı atqarylýy tıis. Bir aptada jasalǵan batyrdyń eki músini de áskerı bólim tórinen oryn tapty. Bireýi  garnızondaǵy dańqty jaýynger atyndaǵy mýzeıge qoıylsa, ekinshisi  áskerı bólimniń kire berisindegi alleıadan turaq tapty. Alaıda,  qazaqtyń mańdaıyna bitken batyrdyń qos bıýstin turǵyzǵannan keıin de áskerı qyzmetshi damyl tappaı, Óskemendegi áskerı qalashyqta saıabaq boı kótergen, demalys ornyna áskerı otbasynyń músini qajet bolyp, ol bul eskertkishti bir aptaǵa jetkizbeı somdap shyǵady. El kóńilinen shyqqan eskertkishke búginde qala turǵyndary me kelgen qonaqtar baryp, tamashalap, sýretke túsip júr. Alaıda Raı Orazbekov bolsa, qolónerdi jeke hobbıim deıdi eken.

27943 áskerı bólimi polıgonynyń bastyǵy budan keıin de birqatar ilkimdi isterdiń sebepshisi atanady. Ótken jyly shahardaǵy Sársen Amanjolov atyndaǵy Shyǵys Qazaqstan memlekettik ýnıversıteti qabyrǵasynan áskerı kafedra ashylady. Osyǵan oraı, Qabanbaı batyrdyń bıýstin jasap shyǵarady. Kapıtan bul týyndysyn da sozbaqqa salmaıdy.  Nebary bir apta ótpeı daıyn bolady.

Raıdyń qolónerden bólek, áskerı salada atqarǵan jemisti isteri jeterlik. Oqý-jattyǵý polıgony bastyǵy  qazirgi kúnde qaýyrt jumysynyń  qyzý qarqynynda  qolónermen aınalysýdy bir shetke ysyryp qoıǵan. «Áskerı  qyzmet men úshin birinshi orynda» deıdi ol. Saýsaǵynan bal tamǵan sheber jaıynda óńirdegi  qolbasshylyqta  jaǵymdy pikirde.

–  «Shyǵys» óńirlik qolbasshylyǵyna qarasty  tórt polıgon bolsa, eń ozyǵy Raı basqaratyn  oqý-jattyǵý alańqaıy dep sanaımyn. Sebebi ol byltyr ǵana polıgon bastyǵy bolyp taǵaıyndaldy. Áskerı qyzmetshi  nebary qysqa ýaqyttyń ishinde oqý-jattyǵý alańyn adam tanymastaı ózgertti. Polıgonda dóńgelekti tehnıkaǵa arnalǵan avtodrom joq edi. Taıaýda  arnaıy avtodrom iske qosyldy. Polıgondaǵy elektr baǵanalaryn  jańartyp, jaryq ta ornatty. Oqý-jattyǵý alańynda ornalasqan áskerı nysandardyń birazyn qaıta jóndedi.  Tipti eski ǵımarttardyń ózi ádemilenip, barlyǵy gúldengen. Abattandyrý jumystary júrgizilgen. Áskerı nysandar jańa shatyr jabyndysymen jabdyqtalǵan. Men Raıdyń tapsyrmany jedel oryndaıtyndyǵyna tań qaldym. Ol tek músin jasaýda ǵana emes, kez kelgen  isti jyldam ári sapaly oryndaıdy, – deıdi «Shyǵys» óńirlik qolbasshylyǵynyń jaýyngerlik daıarlyq basqarmasynyń aǵa ofıeri maıor Qanat Kapanov.

Almas qylysh qyn túbinde jatpaıdy degendeı, Raı boıyndaǵy óneri áskerı salada da óz arnasyn tapty.  Al, otbasyda  úsh balanyń ardaqty ákesi atanǵan  azamattyń  ustanymy adam bop ómirge kelgen soń, adamgershilikti bıik ustaý eken.

Abaı óńirlik garnızonynyń baspasóz qyzmeti

"Adyrna" ulttyq portaly

Pikirler