Kıtaphana dästürlı kıtap mädenietı men zamanaui sifrlyq tehnologiialardy özara üilestıre otyryp, qala tūrǧyndary üşın qoljetımdı, aşyq ärı köpfunksionaldy mädeni jäne bılım beru alaŋy retınde jobalanǧan. Jaŋa formattaǧy būl keŋıstık bılım aluǧa, şyǧarmaşylyqpen ainalysuǧa, ziiatkerlık äleuettı damytuǧa jäne mädeni qarym-qatynasty nyǧaituǧa baǧyttalǧan.
Jaŋa kıtaphananyŋ saltanatty aşylu räsımıne Almaty qalasynyŋ tūrǧyndarymen qatar qala basşylyǧynyŋ ökılderı, ǧylym men mädeniet salasynyŋ körnektı ökılderı, belgılı ǧalymdar, jazuşylar, ädebiettanuşylar jäne qoǧam qairatkerlerı qatysty. Is-şara barysynda kıtaphananyŋ negızgı baǧyttary men aldaǧy damu josparlary tanystyrylyp, onyŋ qala ömırındegı rölı jan-jaqty atap ötıldı.
Kıtaphananyŋ bai kıtap qory men zamanaui materialdyq-tehnikalyq bazasy ärtürlı jas sanatyndaǧy jäne qyzyǧuşylyǧy aluan türlı oqyrmandardyŋ sūranysyn tolyqtai qanaǧattandyruǧa mümkındık beredı. Mūnda kompiuterlık zal, jeke jūmys ısteuge arnalǧan tynyş oqu aimaqtary, sondai-aq toptyq kezdesulerge, pıkır almasuǧa jäne şyǧarmaşylyq jobalardy jüzege asyruǧa arnalǧan arnaiy keŋıstıkter jabdyqtalǧan. Barlyq aimaqtar oqyrmandardyŋ yŋǧaily ärı tiımdı jūmys ısteuıne laiyqtalyp jasalǧan.
Sonymen qatar, kıtaphanada keluşılerdıŋ uaqytyn mazmūndy ärı jaily ötkızuı üşın barlyq jaǧdai qarastyrylǧan. Erekşe qajettılıgı bar azamattarǧa arnalǧan arnaiy beiımdelgen jūmys oryndary ornatylyp, inkliuzivtı orta qalyptastyrylǧan. Köru qabıletı tömen oqyrmandar üşın ırı qarıptegı, sondai-aq arnaiy formattaǧy ädebietter qory jinaqtalyp, qoljetımdılıktı arttyruǧa baǧyttalǧan jüielı jūmystar jürgızılgen.
Is-şara barysynda söz söilegen Almaty qalasy äkımınıŋ orynbasary Abzal Nükenov jaŋa kıtaphananyŋ qalanyŋ mädeni jäne ruhani ömırındegı maŋyzyn erekşe atap öttı.
«Kıtaphana – qalanyŋ ruhani tynysyn aiqyndaityn oryn. Bız öz tarapymyzdan qala tūrǧyndaryna jaŋa bılım närımen susyndauǧa, jan-jaqty damuyna jaǧdai jasap otyrmyz. Būl kıtaphana tek kıtap oqityn oryn emes, oi men ideia toǧysatyn zamanaui mädeni ortalyq», – dedı Abzal Nükenūly.
Kıtaphananyŋ erekşe jobalarynyŋ bırı – balalar men jasöspırımderdıŋ kıtap oquǧa degen qyzyǧuşylyǧyn arttyruǧa baǧyttalǧan «Oqy – oina!» jobasy. Atalǧan joba aiasynda balalar aimaǧynda PlayStation 5 ornatylyp, oiyn men oqudy ūştastyratyn tyŋ format ūsynylǧan. Būl bastama balalardyŋ kıtaphana keŋıstıgıne degen qyzyǧuşylyǧyn arttyryp, olardyŋ kıtapqa jaqyndyǧyn erte jastan qalyptastyruǧa jäne oqu mädenietın damytuǧa yqpal etedı.
Saltanatty jiynda söz alǧan ädebiettanuşy, Qazaqstannyŋ eŋbek sıŋırgen qairatkerı Qanseiıt Äbdezūly da jaŋa kıtaphananyŋ tärbielık jäne mädeni maŋyzyna toqtaldy.
«Kıtaphana – bolaşaq oqyrmandy tärbieleitın maŋyzdy mädeni orta. Mūndai zamanaui ärı tolyq qoljetımdı keŋıstıktıŋ aşyluy jastardy kıtapqa jaqyndatyp, oqyrman mädenietın jaŋa deŋgeige köteredı», – dedı Qanseiıt Äbdezūly.
Jalpy alǧanda, būl bastama Almaty qalasynyŋ mädeni infraqūrylymyn odan ärı damytuǧa, oqyrman mädenietın jaŋǧyrtuǧa, sondai-aq ūlttyq ruhani qūndylyqtardy nyǧaituǧa baǧyttalǧan maŋyzdy qadam retınde baǧalanyp otyr. Jaŋa kıtaphana qala tūrǧyndary üşın tek bılım alu orny ǧana emes, sonymen qatar şyǧarmaşylyq pen ziiatkerlık damuǧa jol aşatyn orta bolmaq.
Aita keteiık, qalalyq jaŋa kıtaphana Rozybakiev köşesı, 247-üi, 7-blok mekenjaiynda ornalasqan. Ol qala tūrǧyndary men qonaqtary üşın kündelıktı saǧat 08:30-dan 20:00-ge deiın, demalyssyz qyzmet körsetedı.
