Batys Qazaqstanda oblysynda boran saldarynan bır üiır jylqy qyrylyp qalǧan. Äleumettık jelılerde Batys Qazaqstan oblysy Qaztalov audanyndaǧy Saraljyn auylynda qatty boran saldarynan qyrylyp qalǧan jylqylardyŋ videosy tarady, dep habarlaidy "Adyrna".
Beinejazbada er adam boran kezınde jylqylardyŋ su aidynynda qalyp qoiǧanyn aitady. Onyŋ sözınşe, demalys künderı öŋırde bolǧan qarly dauyl kezınde januarlar däl sol jerde tabiǧi apatqa tap bolǧan.
Saldarynan üiırdegı jylqylardyŋ basym bölıgı qyrylǧan.
Atalǧan aqparatty Qaztalov audandyq äkımdıgı rastady.
«Qazırgı uaqytta qyrylǧan maldyŋ sany men keltırılgen şyǧyn kölemı eseptelıp jatyr. Audan äkımdıgı tūrǧyndardy aldaǧy qolaisyz aua raiy turaly aldyn ala eskertken bolatyn. Mal basyn qorada ūstaudy sūradyq. Alaida barlyǧy bırdei būl eskertudı eskermedı, sonyŋ saldarynan boran kezınde keibır mal aşyq jaiylymda qalyp qoidy», — dep habarlady audan äkımdıgınıŋ baspasöz qyzmetı.
