Türkıstan oblysy Maqtaaral audanynda poliseiden qaşqan küdıktı qaza tapty, dep habarlaidy “Adyrna” ūlttyq portaly.
Oblystyq polisiia departamentınıŋ mälımetınşe, jergılıktı tūrǧyn özınıŋ būrynǧy küieuı qaru alyp, kışkentai balalarynyŋ közınşe şu şyǧarǧanyn habarlaǧan. Polisiia oqiǧa ornyna jetkende er adamdy ūstauǧa tyrysqan.
Degenmen, küdıktı üiden qaşyp, körşısınıŋ aulasyndaǧy saraiǧa tyǧylǧan. Qauıpsızdıktı qamtamasyz etu üşın oqiǧa orny qorşalǧan.
PD deregınşe, er adam polisiiaǧa oq atqan. Poliseiler de eskertu retınde auaǧa oq atqanymen, küdıktı berılmegen. Alaida oqiǧa barysynda er adamǧa qyzmettık qarudan atylǧan oq tiıp, onyŋ sol jerde qaza tapqany aitylady.
Tekseru kezınde tırkelmegen qaru, patrondar men gilzalar tabyldy. Qazırgı uaqytta barlyq qajettı tergeu jäne jedel-ızdestıru şaralary jürgızılude. Is boiynşa qylmystyq ıs qozǧalǧan.
