2025 jylǧy 5 qaraşa künı Aqtau qalasynda erekşe bılım beru qajettılıkterı bar balalarǧa arnalǧan bıregei medisinalyq jobanyŋ qorytyndysyna arnalǧan baspasöz konferensiiasy öttı. Auqymdy qaiyrymdylyq jobanyŋ nätijesınde 150-den astam balaǧa 153 innovasiialyq operasiia jasalyp, jaŋa ömırge qadam basty.
Joba BI Group qūrylys kompaniiasy men Maŋǧystau oblystyq densaulyq saqtau basqarmasynyŋ qoldauymen «BI-Jūldyzai» korporativtık qorynyŋ bastamasymen jüzege asyryldy. Barlyq otalar Maŋǧystau oblystyq köpbeiındı balalar auruhanasynda "Mümkındık" baǧdarlamasy aiasynda ötkızıldı.
Şeteldık jetekşı därıgerler erekşe balalardyŋ motorlyq funksiialaryn qalpyna keltıru jäne ömır süru sapasyn arttyru maqsatynda kürdelı ota türlerın tegın türde jürgızdı. Hirurgiialyq emdeu älemnıŋ jetekşı klinikalarynda qoldanylatyn, öŋırde balamasy joq ozyq ädıstermen şeteldık mamandar jürgızdı. Otadan keiın balalar oŋaltu jäne fizioterapiia kurstaryn densaulyq saqtau salasyna jauapty basqarmanyŋ qoldauymen jalǧastyruda.
Aita keteiık, hirurgiialyq emdeuden bölek, 365 bala professorlardan keŋes aldy, al 110 qazaqstandyq maman qormen bırlesıp ūiymdastyrylǧan 11 master-klasta oqudan öttı.
Jiyn barysynda 11 otadan ötken 9 jasar Ameliia esımdı büldırşınnıŋ "Tūsau keser" räsımı boldy. Būl – medisinalyq kömektıŋ naqty nätijesın körsetetın ärı köpşılıktıŋ köŋılıne ümıt ūialatqan erekşe ärı äserlı sät boldy.
20 jyldan astam uaqyt boiy "BI–Jūldyzai" qory inkliuziia, medisina, sport jäne şyǧarmaşylyq salalarynda erekşe balalardyŋ äleuetın aşuǧa, qoǧamǧa beiımdeluıne yqpal etıp keledı. «Mümkındık» baǧdarlamasy — qordyŋ eŋ ırı medisinalyq bastamasy. Jyl saiyn balalar osy jobanyŋ arqasynda tolyqqandy ömırge qadam basuda.
Būl – öŋır medisinasyndaǧy erekşe balalarǧa arnalǧan ırı äleumettık jäne medisinalyq bastama. Ūiymdastyruşylardyŋ aituynşa, osyndai jobalar aldaǧy uaqytta da jalǧasyn tabatyn bolady.
