Bügın, 28 qazanda «Aqorda» rezidensiiasynda Finliandiia prezidentı Aleksandr Stubbty qarsy alu räsımı öttı, dep habarlaidy «Adyrna» tılşısı.
Būl — onyŋ prezident retınde elımızge jasaǧan alǧaşqy resmi sapary.
Memleket basşysy Qasym-Jomart Toqaev Finliandiia prezidentımen kelıssöz jürgızıp,ekı eldıŋ ortasynda şeşımın tappaǧan mäsele joq ekenın jetkızdı.
«Sızdıŋ saparyŋyz – ekıjaqty yntymaqtastyqty damytuǧa tyŋ serpın beru tūrǧysynan öte maŋyzdy. Qazaqstan men Finliandiia arasynda dostyqqa ärı özara tüsınıstıkke negızdelgen yqpaldastyq ornaǧan. Ekı eldıŋ ortasynda şeşımın tappaǧan mäsele joq. Degenmen investisiia jäne sauda salalarynda bırqatar mümkındık bar. Sızdıŋ bastamaŋyzben ötıp jatqan biznes-forumnyŋ orny erekşe. Bügın atalǧan jiynǧa qatysamyn. Būl käsıpkerlerımızdıŋ ıskerlık bailanystardy örıstetuıne zor septıgın tigızedı dep oilaimyn. Būdan bölek, gumanitarlyq yntymaqtastyqqa airyqşa män beremız. Qazaqstandyqtar Finliandiiany, sızderdıŋ salt-dästürlerıŋız ben mädenietterıŋızdı qūrmetteidı. Köptegen otandasymyz Sızdıŋ elge turist retınde jiı barady. Saparyŋyz memleketter arasyndaǧy serıktestıktı nyǧaitu üşın jaŋa mümkındıkterge jol aşatynyna senımdımın»,—dedı ol.
Al Aleksandr Stubb Qazaqstanǧa üşınşı märte kelıp otyrǧanyn aitty.
«Būl menıŋ Qazaqstanǧa üşınşı märte keluım. Alǧaş ret 2008 jyly men Syrtqy ıster ministrı, al sız Senat spikerı lauazymyn atqarǧan kezde jüzdesken edık. Būl joly ekı baǧytqa basa nazar audaramyz dep oilaimyn. Bırınşı – özara qarym-qatynas jäne ıskerlık bailanystar. Bügın Finliandiiadan ülken delegasiia keldı. Onyŋ qūramynda 20-dan astam ırı kompaniianyŋ ökılderı bar. Astana köşelerınen Isku jäne Honkarakenne siiaqty tanymal fin brendterın kördım. Būl bızdı quantady. Kelıssözdıŋ ekınşı baǧyty – syrtqy saiasat jäne qauıpsızdık. Bırşama mäsele boiynşa ūstanymdarymyz ortaq, kürdelı halyqaralyq jaǧdailardyŋ şeşımın tabuǧa bırlese ūmtylamyz»,—dep pıkır bıldırdı Finliandiia prezidentı.
