Qostanaı oblysynyń Torǵaı aýylynda Ahmet Baıtursynuly men Mirjaqyp Dýlatulynyń eskertkishteri boı kótermek. Bul týraly Mádenıet jáne sport mınıstri Dáýren Abaev málimdedi, dep habarlaıdy «Adyrna» tilshisi.
«Keshe Ulttyq akademııalyq kitaphanada Monýmenttik óner qurylystaryn ornatý jónindegi komıssııa otyrysy ótti. Jıynda monýmentaldy óner salasyndaǵy sarapshylarmen kóptegen ózekti máseleni talqyladyq.
Otyrysta maquldanǵandaı, aldaǵy ýaqytta Qostanaı oblysynyń Torǵaı aýylynda Alash qaıratkerleri Ahmet Baıtursynuly men Mirjaqyp Dýlatulynnyń eskertkishteri boı kóteredi. Sondaı-aq Almaty qalasynda Ahmet Baıtursynulyna eskertkish jáne teatr qaıratkeri Jumat Shanınge bıýst ornatylady»,— dedi ol.
Sondaı-aq, Komıssııa músheleri Jambyl, Qaraǵandy, Qostanaı, Túrkistan jáne Ulytaý oblystary ákimdikteriniń ıdeıalyq usynystaryn biraýyzdan qoldady.
Atalǵan óńirlerde Qazaqstannyń Halyq jazýshysy Sherhan Murtazaǵa, aqyn, memleket jáne qoǵam qaıratkeri Kákimbek Salyqovqa, Nııaz batyr Saıdaly Barqyulyna, ekinshi dúnıejúzilik soǵys jáne eńbek ardageri Jaqsybek Ońshybaevqa, sondaı-aq túrik saıasatkeri, memleket qaıratkeri Adnan Menderske arnalǵan eskertkishterdi jobalaý josparlanyp otyr.
