Ūlytau oblysy äkımı Dastan Ryspekovtıŋ töraǧalyǧymen kezektı apparat jiyny öttı. Kün tärtıbındegı mäselelerge deiın öŋır basşysy Ūlytau oblysy boiynşa memlekettık kırıster departamentınıŋ basşysyn tanystyrdy.
Kün tärtıbınde otandyq öndıruşılerdı damytu men qoldau şaralary, kommunaldyq menşık nysandaryn basqaru jäne memlekettık satyp alulardy ötkızu jaiynda mäseleler qaraldy.
Oblys äkımı käsıpkerlerge jasalyp jatqan memlekettık qoldau şaralarynyŋ joǧary deŋgeide jürgızılıp jatqandyǧyn atap ötıp, endıgı kezekte önım öndıru ısın alǧa qoiu qajettıgın eskerttı. Būl tūrǧyda öŋır basşysy käsıporyn aşqysy keletın, öndırısın keŋeitkısı keletın käsıpkerlerge de kömek körsetudı tapsyrdy. Ol baǧyttaǧy jūmysty şiratu üşın «Atameken» käsıpkerler palatasymen, «Ūlytau» ÄKK-men bırlesken türde tüsındıru jūmystaryn küşeitu mındetın jüktedı.
Sondai-aq keŋeste qūqyqtyq qūjattary joq mülıkter mäselesı de köterıldı. Öŋır basşysy būl qordalanǧan mäselenı kezeŋ-kezeŋımen şeşu maqsatynda Jezqazǧan qalasy äkımıne jol kartasyn daiyndaudy tapsyrsa, Jaŋaarqa audany men Qarajal qalasyndaǧy nysandardy zaŋdastyru üşın jergılıktı äkımderge aldaǧy ekı apta ışınde ūsynys berudı jüktedı.
«90-şy jyldary öŋırdegı bırqatar nysan jekenıŋ qolyna ötıp kettı, arasynda negızsız berılgenderı boluy da mümkın. Sondyqtan būl ǧimarattardy memleket qajettılıgıne qaitarudy şūǧyl qolǧa aluymyz qajet. Osy mäsele boiynşa tiıstı qūjat daiyndap, tızım jasaudy, atalǧan mäselenı qūqyq qorǧau organdarymen bırlesıp pysyqtaudy tapsyramyn»,-dedı öŋır basşysy öz sözınde.
Keŋeste oblys basşysy memlekettık satyp aludyŋ uaqytyly ärı sapaly oryndaluy qajet ekenın taǧy bır ret eskerttı.
Qūrylys, abattandyru, kögaldandyru jäne joldardy jöndeu jūmystarynyŋ kestege sai jüruı konkurstardyŋ uaqytyly jürgızıluıne tıkelei bailanysty ekendıgın alǧa tartyp, talap oryndalmaǧan jaǧdaida 9 aidyŋ nätijesınde qorytyndy şyǧarylatynyn jetkızdı.
