"Kölsai kölderı" memlekettık ūlttyq tabiǧi parkınıŋ qyzmetkerıne Reseiden marapat keldı. Būl turaly tabiǧi parkt äleumettık jelıdegı paraqşasynda jazdy, dep habarlaidy "Adyrna".
Aqparatqa säikes, 2025 jylǧy 1 qazandaǧy №364 būiryqqa säikes, Resei Federasiiasynyŋ Orman şaruaşylyǧy federaldyq agenttıgı "Kölsai kölderı" MŪTP direktorynyŋ orynbasary Hamit Aǧabekūlyn «Orman qorǧau qyzmetıne 85 jyl» estelık tösbelgısımen marapattady.
Marapat orman qorǧau qyzmetın damytuǧa qosqan ülesı, adal eŋbegı jäne tabiǧatty saqtau men qalpyna keltıru baǧytyndaǧy jetıstıkterı üşın tabystaldy.
Aita keteiık, būǧan deiın Telegram messendjerınıŋ negızın qalauşy Pavel Durov Almaty oblysyndaǧy Kölsai kölınde şomylǧan videosyn jariialaǧan bolatyn. Būl äreket äleumettık jelılerde synǧa ūşyrady, öitkenı ūlttyq park erejelerı boiynşa kölde şomyluǧa tek arnaiy belgılengen jerlerde ǧana rūqsat etılgen. Zaŋdy būzǧandar üşın 39 myŋ teŋge kölemınde aiyppūl qarastyrylǧan.
Keiın Durov özınıŋ Telegram-arnasynda jaŋa video jariialap, su tübınen temır taiaq alyp şyqqan sätın körsettı. Ol būl äreketın köldı qoqystan tazalau nietımen bailanystyrdy.
«Qazaqstandaǧy tauly köldıŋ tübınen temır tauyp, alyp tastadym», – dep jazdy ol.
Qyzyǧy, būl jaǧdaidan keiın Durovtyŋ özın aiyptau nemese aiyppūl salu ornyna, ūlttyq park qyzmetkerlerıne qatysty qyzmettık tekserıs bastaldy. Olar şeteldık qonaqtyŋ ereje būzuşylyǧyna jol bergenı üşın jauapqa tartyluy mümkın.
