24 qyrküiekte Mäjılıs mädeniet, bılım beru, otbasy jäne memlekettık baqylau mäselelerı boiynşa tüzetulerdı ekınşı oqylymda qabyldady, dep habarlaidy «Adyrna» tılşısı.
Zaŋ boiynşa jūmys tobynyŋ jetekşısı Rinat Zaiytov mädeni-būqaralyq ıs-şaralarda fonogramma qoldanuǧa bailanysty talaptar qataŋdatylǧanyn mälımdedı. Aituynşa, qūjatta zaŋsyz fonogramma qoldanǧandarǧa jauapkerşılık qarastyrylǧan.
«Jappai tyiym salu emes, tek 200 adamnan joǧary syiymdylyǧy bar mädeni būqaralyq ıs-şaralardy qamtidy. Onyŋ ışınde beiımdelmegen, arnaiy qūral-jabdyqtarmen jabdyqtalmaǧan alaŋdar bolatyn bolsa, ol jerde fonogrammaǧa rūqsat etıledı. Basqa jerde eŋ bırınşı körermennıŋ, tūtynuşynyŋ müddesı alda tūrady. 25-50 myŋǧa bilet alǧan körermen «auzyn jybyrlatqan änşını tyŋdau kerek» degen qaǧida bolmau kerek. Barǧannan keiın änşınıŋ konsertke degen daiyndyǧyn, deŋgeiın köruge qūqyly dep oilamyn»,—dedı ol.
Deputat zaŋdy būzyp, fonogrammany qoldanǧan jaǧdaida aiyppūl salynuy mümkın ekenın jetkızdı.
«Ūiymdastyruşy – sol änşımen kelısımşartqa otyratyn, sahnany jaldaityn, bilettı satatyn tūlǧa. Sondyqtan jauapkerşılık te sol tarapqa jükteluı kerek. Qazır būl normaǧa säikes, aiyppūl kölemı 1 000 AEK (şamamen 3,5 mln teŋge) boluy mümkın degen ūsynys qaralyp jatyr»,– dep tolyqtyrdy Zaiytov.
