Prezident Qasym-Jomart Toqaev pen ministr Takeşi İvaia sauda-ekonomikalyq, investisiialyq, kölık-tranzit jäne mädeni-gumanitarlyq salalardaǧy qazaq-japon keŋeitılgen strategiialyq serıktestıgınıŋ qazırgı jai-küiı men damu perspektivasyn talqylady. Sondai-aq halyqaralyq qūrylymdar aiasyndaǧy yqpaldastyq jönınde pıkır almasty, dep habarlaidy "Adyrna" tılşısı.
Qasym-Jomart Toqaev Japoniia syrtqy saiasat vedomstvosynyŋ basşysyna ıltipat bıldıre otyryp, onyŋ Astanaǧa sapary ekı el arasyndaǧy qarym-qatynasty arttyruǧa tyŋ serpın beretının atap öttı.
– Japoniia – Aziiadaǧy senımdı ärı jaqyn serıktesımız. Bız Tokiomen jan-jaqty yntymaqtastyqty nyǧaituǧa erekşe män beremız. Premer-ministr İşibaǧa ystyq yqylasymdy jetkızudı sūraimyn. Premer-ministr Şigeru İşiba Qazaqstanǧa resmi saparmen kelmekşı. Bız onyŋ saparyn asyǧa kütıp, daiyndaludamyz. Özara qarym-qatynasymyz joǧary qarqynmen damyp kele jatyr dep senımmen aituǧa bolady, – dedı Prezident.
Öz kezegınde Takeşi İvaia qonaqjailyq tanytqany üşın Qazaqstan Prezidentıne rizaşylyǧyn bıldırdı.
– Sızdıŋ sälemıŋızdı Premer-ministrımızge mındettı türde jetkızemız. Qazaqstan men Japoniia – halyqaralyq tärtıptı küşeituge müddelı strategiialyq serıktester. Menıŋ būl saparym ekı el arasyndaǧy bailanysty odan ärı damytuǧa jol aşady dep oilaimyn, – dedı Japoniia Syrtqy ıster ministrı.
Sonymen qatar Qasym-Jomart Toqaev pen Takeşi İvaia halyqaralyq jäne öŋırlık kün tärtıbındegı özektı mäseleler jönınde äŋgımelestı.
