Bügın - qazaqtyŋ bırtuar aqyny Abai Qūnanbaiūlynyŋ tuǧan künı.
Biyl qazaqtyŋ ūly aqyny, oişyly Abai Qūnanbaiūlynyŋ tuǧanyna 180 jyl tolyp otyr. Ol 1845 jyly qazırgı Abai oblysynyŋ Qarauyl auylynda düniege kelıp, qazaq ädebi tılınıŋ negızın qalauşy tūlǧa.
Mereitoiǧa orai elımızde Abai onkündıgı ötıp jatyr. Abai oblysynda Jidebai-Börılı muzeiınde «Abai beineleu önerınde» körmesı aşyldy. Qarauyltöbede respublikalyq «Jetı qazyna» festivalı, Abai oqulary, aqyndar aitysy, halyqaralyq ǧylymi konferensiialar ūiymdastyryldy. Mereke aiasynda Qazaqstan boiynşa 100-den astam mädeni jäne ǧylymi ıs-şara ötkızu josparlanǧan.
Merekenıŋ şaryqtau şegı aqynnyŋ tuǧan jerı – Abai oblysynda ötude.
Bügın taŋerteŋ Jidebaidaǧy qoryq-mekende qūran baǧyştalyp, qūrbandyq şalynady. Elımızdıŋ barlyq öŋırlerınde Abai eskertkışterıne gül şoqtary qoiylady. Qarauylda «Bala Abaidan dana Abaiǧa» atty teatrlandyrylǧan qoiylymmen bastalǧan merekelık baǧdarlama konserttermen, ūlttyq as beru räsımımen, at jarys pen qazaq küresınen respublikalyq turnirlermen jalǧasady.
Keşkısın Qarauylda «Jelsız tünde jaryq ai» atty gala-konsert ötedı. Semeide parallel türde «Ūlytau» toby men estrada jūldyzdarynyŋ qatysuymen Abai änderıne arnalǧan ülken konsert ūiymdastyrylmaq. Būl şaralar onkündık merekenıŋ qorytyndysy bolmaq.
Eske sala keteiık, 2020 jyldyŋ 5 tamyzynda Qazaqstan Respublikasy Ükımetınıŋ Qaulysymen 10 tamyz Abai künı bolyp belgılendı. Būl mereke Abai Qūnanbaiūlynyŋ 175 jyldyq mereitoiynyŋ qarsaŋynda bekıtılgen edı.
Mereke resmi demalys künı bolyp sanalmaidy.
