Işkı ıster ministrlıgı būrynǧy Qorǧanys ministrı Ruslan Jaqsylyqovtyŋ qamauǧa alynǧany jönındegı aqparatqa bailanysty Kazinform agenttıgınıŋ resmi saualyna jauap berdı.
«Sūrauhatta körsetılgen adamnyŋ qamauǧa alynǧany turaly būqaralyq aqparat qūraldarynda körıneu jalǧan aqparat taratu faktısı boiynşa Astana qalasynyŋ Polisiia departamentı Qylmystyq kodekstıŋ 274-baby 2-bölıgıne (būqaralyq aqparat qūraldaryn nemese telekommunikasiialar jelılerın paidalana otyryp, körıneu jalǧan aqparat taratu) säikes sotqa deiıngı tergeu jürgızıp jatyr», – delıngen ministrlıktıŋ resmi jauabynda.
Sonymen qatar, vedomstvo būl qylmystyq ıstıŋ naqty kımge qatysty qozǧalǧanyn jariialaudan bas tartty. IIM ökılderınıŋ aituynşa, būl QR Qylmystyq-prosestık kodeksınıŋ talaptaryna bailanysty.
«QR Qylmystyq-prosestık kodeksınıŋ 201-babyna säikes, sotqa deiıngı tergep-tekseru derekterı jariia etılmeuı tiıs. Tergeu jürgızılıp jatyr. Anyq-qanyǧy tergeu barysynda anyqtalady. Basqa mälımet bere almaimyz», – dep habarlady ministrlık.
Aita keteiık, Ruslan Jaqsylyqovtyŋ qamauǧa alynǧany jönındegı aqparat alǧaş ret anonimdı Telegram-arnalarda taralyp, keiın keibır aqparattyq portaldarda köşırılıp basylǧan bolatyn. Būǧan deiın Bas prokurordyŋ orynbasary Äset Şyndaliev te būl mäselege qatysty pıkır bıldırgen edı.
