Daýdyń basy – Temenovtyń povesi. Áıgili «Mahabbat beketi» fılmi Temenovtyń «Gúlnáz» povesi jelisimen túsirilgenin eskersek, fılmniń jalǵasyn túsirmekshi bolyp júrgen Alagózova Temenovten ruqsat suramaı, bul iske belsene kirisipti. Atyshýly prodıýserdiń aıtýynsha, fılmniń avtorlyq quqyǵy «Qazaqfılmge» tıesili jáne ol Mádenıet mınıstrliginen tıisti ruqsat ta alyp úlgergen eken.
Osy máselege qatysty tanymal jýrnalıst Bıbigúl Dáýletbekqyzy da pikir bildirip, rejısser Talǵat Temenovtiń «Mahabbat beketi» fılmi bolmasa, Baıan Alagózovany búginde eshkim tanymaıtynyn aıtty. Bul týraly ol óziniń jelidegi paraqshasyna jazdy, – dep habarlaıdy "Qazaq úni" gazeti
– Baıan – burynǵy Esentaeva, qazirgi Alagózova ápkemiz Talǵat Temenovtiń kezinde halyqtyń ólip-óship jaqsy kórgen «Mahabbat beketiniń» 2 bólimin túsirip jatyr eken. Taǵy kelip ruqsatyn almaǵan kórinedi. Ol ol ma, keıipkerlerdiń aty Gúlnáz ben Oral. Mássaǵan, bezgeldek! Talǵat aǵamyz shyryldap: «Bul meniń jazǵan «Gúlnáz» degen povestim ǵoı. Al, «Mahabbat beketi» meniń avtorlyq fılmim. Ideıasyna deıin kóshirip alǵany bylaı tursyn, áýenin de alǵan» dep qynjyla aıtady. Al, oǵan Baıanka ápkemiz beti búlk etpeı: «Mádenıet mınıstrinen ruqsat aldym» dep qoıady, – dep jazdy jýrnalıst.
Dáýletbekqyzynyń pikirinshe, ıntellektýaldy urlyq jasaý – naǵyz qylmys.
– «Gúlnáz» povestin jazǵan belgili rejısser Talǵat Temenov kókemiz. Ol kisini álem tanıdy. Syılaıdy. Bas ıedi. Osy povest boıynsha túsirilgen «Mahabbat beketi» fılminiń rejısseri de Talǵat Temenov. Álde byltyr ǵana osy áıeldiń tarıhı serıalymyz «Qozy Kórpesh – Baıan Sulýdy» yrym-jyrymyn shyǵarǵanynan habarsyzsyz ba? Túsirsin «korovasyn» onda sharýamyz shamaly (Ol da káristerden urlanǵan dúnıe…), – deıdi telejúrgizýshi.
– Eger Talǵat Temenov bolmasa, Baıandy búgin Qazaq halqy tanymas edi. Baıandy Baıan etken – Gúlnáz. Al «Gúlnáz»-di povest etip jazyp, fılmniń ıdeıasyna deıin oılap shyǵarǵan – Talǵat Temenov. Mıllıondaǵan kórermen sol fılm úshin de Baıannyń nebir hıkaıalaryn keshirip keledi. Al, ıdeıa urlaǵan adamdy ómirde jek kóremin. Qarsymyn! Sondyqtan da, bul joly Talǵat aǵamyz jaǵyndamyn, – dep sanaıdy Dáýletbekqyzy. qazaquni.kz. osylaı dep jazady.
Biz bul maqalany jarııalaı otyryp, asyqpaıyq degimiz keledi. Bul másele áli de jalǵasyn tabar degen oıdamyz. Sebebi, álemde joly bolǵan fılm týyndynsynyń jalǵasyn túsirý keńinen etek alǵan jaǵdaı. Basqa elderde bundaı úrdistiń baıaǵydan keń etek jaıýy, birinshiden jaqsy ıdeıa tabý úshin kim de bolsa keremet daryn ıesi bolýy shart. Ekinshiden bulaı etý ataqty bolýdyń eń qysqa joldarynyń biri. Biraq, bul joldyń bir biraǵy bar. Eger fılm nashar bolsa ómir boıy jınaǵan atyńa óshpes kir keltiresiń.
Eger Baıan Alagózova avtorlyq quqyq "Qazaqfılmge" tıesili dese, jáne ol ras bolsa, onda áńgime shynynda shıelenise túspek. Rejısser Talǵat Temenovtiń óz fılmine avtorlyq quqyǵy bar ma? Bul suraqtyń jaýaby qandaı bolmaq? Kúteıik, qanshama "Daýdyń basy Daırabaıdyń ala sıyrynan" bastaldy degen deı, aqyryn kúteıik.
Eń basty suraq fılminiń jalǵasy áli kúnge deıin kópshilik súıip kóretin "Mahabbat beketi" fılminiń kórkemdik deńgeıinde túsirile me? Eń basty suraq osy.
"ADYRNA" ulttyq portaly
