"Qańtar qasireti": Shymkent 21 adamǵa baılanysty qylmystyq isti toqtatty

3000
Adyrna.kz Telegram

Shymkent qalalyq prokýratýrasy Qańtar oqıǵasy kezindegi "Jappaı tártipsizdik" baby boıynsha kúdikke ilingen 21 adamǵa baılanysty qylmystyq isti toqtatý týraly qaýly shyǵarǵan. Bul týraly "Azattyq radıosy" habarlady, dep jazady "Adyrna" ulttyq portaly.

5 shildede Shymkent qalalyq prokýratýrasynyń arnaıy prokýrorlar basqarmasynyń basshysy Nurjan Kólbaev shyǵaryp, 20 shildede qala prokýrorynyń orynbasary Erjan Marat bekitken qaýlyny prokýratýra "kúdikti 21 adamǵa" keshe, shildeniń 25-ine bergen.

Qaýlyda Qańtar oqıǵasy kezinde "jappaı tártipsizdikke qatysty" dep aıyptalǵan 68 adamnyń 58-ine sot úkimi shyqqany, 9 adamnyń isi sot tergeýinde, bir adamnyń isi qala prokýratýrasynda ekeni, taǵy da 27 adam kúdikti retinde tergeýde otyrǵany aıtylǵan.

Qańtar oqıǵasyna baılanysty "Jappaı tártipsizdik" babynyń "jappaı tártipsizdikke shaqyrý" bóligi boıynsha (272-baptyń 3-bóligi) kúdikke ilingen 21 adamnyń isi "jábirlenýshi" dep tanylǵan "Kórme" ortalyǵy men qala ákimdigimen kelisimge kelýine, keltirgen zalaldy óteýine, aıypty moıyndaýy men jasaǵan isine ókinetinine baılanysty toqtatylǵan.

Qylmystyq jaýaptan bosatylǵandardyń úlkeni – 46 jasta, kishisi – 20 jasta. Olardyń ishinde qoǵam belsendileri Nurlybaı Tataev pen Kárıma Haıdarqulova da bar.

- Istiń toqtatylǵanymen tolyq kelisemin. Qazirgi kezde sottalmaǵannyń ózi – jeńis, - deıdi belsendi Nurlybaı Tataev.

4-6 qańtar aralyǵynda Shymkentte bolǵan Qańtar oqıǵasy beıbit sherýmen bastalyp, sońy jappaı dúrbeleńge ulasqan. Oqıǵa kezinde 20 adam qaıtys bolǵan. Olardyń úlkeni – 37 jasta, kishisi – 17 jasta.

Qańtar aıynda qalalyq densaýlyq saqtaý basqarmasy oqıǵa kezinde 125 adam jaralaǵanyn málimdegen. Shymkent qalalyq prokýratýra málimetine qaraǵanda, eki júzden astam adam jaralanǵan, onyń 72-sine oq tıgen.

"Adyrna" ulttyq portaly

Pikirler