Seıitqazy Beısenǵazyuly bizge jas kezimizden úlgi edi. Ol 2-kýrs bitirgen soń stýdenttik qurylys otrıadyna komandır boldy. Bizder - 1 kýrs stýdentteri túgelge jýyq sol otrıadqa jazylyp, jazdyń úsh aıynda Narynqolda qurylys saldyq. Árbirimiz keńestiń 1200 somy mólsherinde jalaqy alyp, bir jyrǵap qalǵanbyz.
Qazaqqa qıyn zaman týǵan 1986-88 jyldary Qaraǵandy oblysynda qatarlasa eńbek ettik. Sekeń eń bedeldi QazTAG tilshisi. Biz jastar gazetiniń tilshisi boldyq. Artymyzda ańdý baryn eskertip, saqtandyryp júrdi.
Osyndaı qıqý onyń basyna 2016 jyly kúzde qaıta oraldy. Sol jyldyń kókteminde biz Mataev tulǵasy týraly telebaǵdarlamaǵa túsirýge qulshynǵanbyz. "Qaınar-jan, qoıa tur, bir máseleler shyqty, solar birjaqty bolsyn" degen. Bul máseleniń baqandaı alty jylǵa sozylaryn biz qaıdan bileıik.
Búgin aqtalypty. Ózi de, uly Áset te. Tergeý durys júrmegen depti. Ony barsha halyqtyń ishi sezetin. "Al tergeý durys júrmeı jatyr" dep jazýǵa oqtalǵanymyzda, isti tergep júrgen tergeýshi "Mataev aınalasyndaǵy jýrnalısterdi ózin qorǵaýǵa tartyp jatyr" dep baıbalam salǵan. Oń nıetimiz teriske shyǵar dep tilimizdi tistegenbiz.
Joǵarǵy sottyń jeti sýdııadan turatyn qylmystyq ister jónindegi alqasy 2022 jylǵy 19 shildede Seıitqazy men Áset Mataevtar eshqandaı qylmystyq áreket jasaǵan joq dep tujyrypty. Ári qylmystyq isti júrgizgen organnyń zańsyz áreketi kesirinen keltirilgen shyǵyndy qaıta toltyrýǵa haqyly depti. Iá, Almatynyń Fýrmanov dańǵylyndaǵy qırap jatqan Ulttyq baspasóz klýbyn jóndettirýge bolady.
Mataevtar oqıǵasy - birneshe jaǵynan erekshe. Aldymen - bul asqan qaısarlyq úlgisi. Ózderiniń kinásiz ekenin bilgendikten, "jazdyq-jańyldyq" dep jalynbaı, aıaǵyna deıin shydady. Ekinshiden, bul sonaý Rysqul men Turardan keıin áke men balanyń birge túrmede bolýy. Úshinshiden, patsha zamanyndaǵy ozbyrlyqtyń Nazarbaev zamanynda qazaqqa qaıta oralýy edi. Odan da arylyp jatqandaımyz.
Adaldyqtyń aq týyn jelbiretken Mataevtar áýletine rızamyz.
Qaınar OLJAI,
"Adyrna" ulttyq portaly
