Seiıtqazy Beisenǧazyūly bızge jas kezımızden ülgı edı. Ol 2-kurs bıtırgen soŋ studenttık qūrylys otriadyna komandir boldy. Bızder - 1 kurs studentterı tügelge juyq sol otriadqa jazylyp, jazdyŋ üş aiynda Narynqolda qūrylys saldyq. Ärbırımız keŋestıŋ 1200 somy mölşerınde jalaqy alyp, bır jyrǧap qalǧanbyz.
Qazaqqa qiyn zaman tuǧan 1986-88 jyldary Qaraǧandy oblysynda qatarlasa eŋbek ettık. Sekeŋ eŋ bedeldı QazTAG tılşısı. Bız jastar gazetınıŋ tılşısı boldyq. Artymyzda aŋdu baryn eskertıp, saqtandyryp jürdı.
Osyndai qiqu onyŋ basyna 2016 jyly küzde qaita oraldy. Sol jyldyŋ köktemınde bız Mataev tūlǧasy turaly telebaǧdarlamaǧa tüsıruge qūlşynǧanbyz. "Qainar-jan, qoia tūr, bır mäseleler şyqty, solar bırjaqty bolsyn" degen. Būl mäselenıŋ baqandai alty jylǧa sozylaryn bız qaidan bıleiık.
Bügın aqtalypty. Özı de, ūly Äset te. Tergeu dūrys jürmegen deptı. Ony barşa halyqtyŋ ışı sezetın. "Al tergeu dūrys jürmei jatyr" dep jazuǧa oqtalǧanymyzda, ıstı tergep jürgen tergeuşı "Mataev ainalasyndaǧy jurnalisterdı özın qorǧauǧa tartyp jatyr" dep baibalam salǧan. Oŋ nietımız terıske şyǧar dep tılımızdı tıstegenbız.
Joǧarǧy sottyŋ jetı sudiiadan tūratyn qylmystyq ıster jönındegı alqasy 2022 jylǧy 19 şıldede Seiıtqazy men Äset Mataevtar eşqandai qylmystyq äreket jasaǧan joq dep tūjyrypty. Ärı qylmystyq ıstı jürgızgen organnyŋ zaŋsyz äreketı kesırınen keltırılgen şyǧyndy qaita toltyruǧa haqyly deptı. İä, Almatynyŋ Furmanov daŋǧylyndaǧy qirap jatqan Ūlttyq baspasöz klubyn jöndettıruge bolady.
Mataevtar oqiǧasy - bırneşe jaǧynan erekşe. Aldymen - būl asqan qaisarlyq ülgısı. Özderınıŋ kınäsız ekenın bılgendıkten, "jazdyq-jaŋyldyq" dep jalynbai, aiaǧyna deiın şydady. Ekınşıden, būl sonau Rysqūl men Tūrardan keiın äke men balanyŋ bırge türmede boluy. Üşınşıden, patşa zamanyndaǧy ozbyrlyqtyŋ Nazarbaev zamanynda qazaqqa qaita oraluy edı. Odan da arylyp jatqandaimyz.
Adaldyqtyŋ aq tuyn jelbıretken Mataevtar äuletıne rizamyz.
Qainar OLJAI,
"Adyrna" ūlttyq portaly
