Burynǵy depýtat ári kezinde Nursultan Nazarbaevtyń keńesshisi qyzmetin atqarǵan Serik Ábdirahmanov tuńǵysh prezıdentke buryn talaı eskertý jasaǵany týraly aıtty, dep habarlaıdy “Adyrna” ulttyq portaly Stan.kz saıtyna silteme jasap.
“Nazarbaevtyń jaqsylyǵynan qııanaty asyp ketedi. 1993 jyly parlamentte mynadaı sózdi uran etip tastadym: “Qazaqstannyń baı jerinde halyqty júdetý qylmys!”. Biz Katar, Kýveıt elderinen baı memleketpiz. Jer baılaǵymyzǵa eshkim talasa almaıdy. Biz Emırattardan artyq turýymyz kerek edi. Osynyń barlyǵyn Nazarbaev urlady ǵoı”, - deıdi burynǵy sheneýnik.
Prezıdent bolý úlken jaýapkershilik ekenin eske salǵan Ábdirahmanov, óziniń Nazarbaevtyń keńesshisi bolyp júrgen ýaqytta onymen jeke kezdesip, qyzdary týraly aıtqanyn jetkizdi.
“Ol ózi meni shaqyratyn. “Serik, aıtshy, halyq ne deıdi?” – dep. Men aldyn ala “renjimeısiz be?” dep surap alatynmyn. Sosyn qyzdary týraly aıtqanmyn. Bir bedeldi janynda júrgen bireý qyzdaryna “Taýgúl” móltek aýdanynan eki kottedj syılapty dep. Biraq ol “Joq, Serik, men ondaıǵa jibermeımin” dedi. Keıin biraq estidim, sol eki kottedj satylyp, qyzdary alǵan eken. Týra sol otyrysta taǵy bir jaıtty aıttym. Sol kúnge jospar quryp barǵan jazýlarym áli kúnge deıin bar. “Nureke, altynshy qabatpen dıplomattar jasyl qaǵazben tasyp júr degen el arasynda sóz tarap jatyr” dedim. Ol kezde de “Joq, men ondaıǵa barmaımyn” degen. Bul 1994 jyl edi”, - dep qosty saıasatker.
Ábdirahmanov Nazarbaevqa kezinde talaı eskertý jasaǵanyn aıta kele, tuńǵysh prezıdentti kinálaýǵa óziniń quqy bar ekenin aıtady.
“Ol meniń adaldyǵymdy kórdi. Sol sebepti men 2007 jyly depýtattyqtan ketkenge deıin talaı nárseni aıtyp otyrdym. Qudalary týraly, Rahat, Tımýr Qulybaev pa, bári týraly. Janynda júrgen adamdardyń tek urlyqpen júrgenin de aıttym. Kárimniń [Kárim Másimov – red.] ornyna meni Qaýipsizdik komıtetiniń tóraǵasy etip qoıyńyz, generaldaryńyzdy shynjyrlap turyp aldyńyzǵa alyp kelemin dedim de. Úndemedi. “Jaǵdaı qıyn bolady. Bir jaǵdaı bolyp qalsa, janyńyzdan tabylatyn adam bolmaıdy” dep Nazarbaevqa talaı aıttym, talaı jazdym. Qulaq aspady. Sondyqtan arym taza”, - deıdi ol.
“Adyrna” ulttyq portaly
