«Aq jol» partııasynyń depýtattary, halyqpen kezdesýlerin jalǵastyrýda.
2022 jyldyń 8 shildesinde QR Parlamenti Májilisiniń depýtaty Qazybek Isa Shymkent qalasynda ornalasqan Túrkistan oblystyq «Qarttar men múgedekter úıi» mekemesine bardy.
Bul mekeme 1965 jyly ashylǵan. Mekemede 170 adam panalaıdy. Mekemede turyp jatqandarǵa 4 mezgil ystyq tamaq beriledi, arnaýly úıirmeler jumys isteıdi, kitaphanasy bar, psıhologtar qarııalarmen tyǵyz jumys jasaýda. Osy mekemede «Aq jol» demokratııalyq partııasynyń eń belsendi múshesi, eń jasy úlken bloger Mámbet Qurmanbaev ómir súredi. Bir neshe jyldar boıy «Qarttar úıi» Mámbet aǵamyz úshin qara shańyraqqa aınalǵan.
«Qarttar men múgedekter úıi» mekemesi Shymkent qalasynda ornalasqanymen Túrkistan oblysyna qarasty. Bul mekemede osy kúnge deıin gaz máselesi sheshilmegen, qysta kómir jaǵylady. Osy másele boıynsha «Qarttar úıiniń» ákimshiligi óz tarapynan QR Parlamenti Májilisiniń depýtaty Qazybek Isaǵa hat joldap, gaz máselesin sheship berý týraly ótinish jasaǵan. Óz tarapynan halyq qalaýlysy QR Energetıka mınıstrligine jáne Shymkent qalasynyń Ákimine hat joldaǵan. Kóp uzamaı másele oń sheshimin taýyp «Qarttar úıi» qysta gazben jylytylatyn boldy. «Qarttar men múgedekter úıiniń» dırektory Sharbat Shyrynbekova: “15 jyldan beri gaz qosamyz dep, qolymyz jetpeı júr edi. Májilis depýtaty, “Aq jol” frakııasy múshesi Qazybek Isanyń yqpalymen bul másele sheshiletin bolatyn boldy. Qazir 3 mıllıon teńge turatyn tehnıkalyq qujattar tegin jasalynyp berildi, tamyz aıynda gaz qubyrlaryn da tegin ornatyp beretin boldy. Kúzge qaraı gaz da kelip qalady dep josparlaýdamyz. Parlamentte halyq sózin sóılep otyrǵan Azat Perýashev bastaǵan
Aqjoldyq depýtattarǵa Aq jol tileımiz!” dep shyn rızalyǵyn, aqjarma tilegin bildirdi.
-“Aq jol” frakııasy hatyn jerde qaldyrmaǵan, áleýmettik jaýapkershilik kórsetip otyrǵan Energetıka mınıstrligine, “Qazaqgaz” ben “QazTransGaz” basshylyǵyna kóp rahmet aıtamyz. Onda sizderge qudaı qalasa, kúzde endi kómirdiń emes… gazdyń shaıyn ishýge taǵy keletin boldyq”-dep depýtat eldi bir kúldirdi. Qurban aıt merekesi qarsańynda qartttardyń jaǵdaıyn surap, quttyqtap, máseleniń mánisin, oryndalýyn óz kózimen kórý úshin kelgenin jetkizdi. Mekeme dırektory Sharbat Shyrynbekovany «Aq jol» QDP tóraǵasy A. Perýashevtyń atynan arnaıy «Dıplommen», al Mámbet Qurmanbaevty «Alǵys hatymen» marapattady.
Kezdesý barysynda qarııalar men múgedekter ózderin mazalaıtyn suraqtar qoıyp, tıisti jaýaptaryn aldy.
Eń birinshi sóılegen mekeme turǵyny, ulty orys Rýslan Romanov qazaq tilinde sóılegen depýtat Qazybek Isanyń Memleketttik til máselesin kóterip júrgenine rahmet aıtyp, qoldaý bildirdi. Memlekettik til máselesi áldeqashan sheshiletin ýaqyt bolǵanyn aıtty.
Rýslan Romanovtyń qazaqsha maıyn tamyzyp sóılegenine rıza bolǵan depýtat Qazybek Isa:
-Mine, memlekettik til máselesin sheshý týraly osynda otyrǵan sizderdiń osyndaı oılaryńyz ben bizdi qoldaýlaryńyzǵa kóp rahmet, bul bizge qýat beredi. Al osyndaı oı otyz jyldan beri joǵaryda otyrǵan bizdiń bıliktegi shetterinen etel tilinde sóıleıtin sheneýnikterimizge jetpeı jatyr áli. Qazaqsha osylaı qatyryp sóılep, úlgi bola berińiz, bizdiń memlekettik tilde bilmese de, memleket qyzmetinde júrgen mınıstrler men ákimderge!”-dep qatty rızalyǵyn bildirdi.
Bir jaqsysy bul mekemedegi ózge ult ókilderiniń kóbisi memlekettik tilde sóıleıdi eken!
Odan keıin sóılegender de ózderiniń zeınetaqylarynyń 70 paıyzy mekemede qalatynyn, sony 50 paıyzǵa túsirýin, áıelderdiń zeınetaqy jasyn 58-ge túsirýin, múgedekterge beriler dári-dármek pen kólik máselesiniń sheshilýi sekildi máselelerdi surady.
Depýtat bul áleýmettik máselelerdiń “Aq jol” frakııasynda qaralyp, úkimetke jiberiletinin aıtty.
Jıyn sońynda Shárbat Shyrynbekova Qazybek Isaǵa Qarttar men múgedekter úıi atynan Alǵystary retinde mekemeniń turǵyny Vasılıı Varnakov atty qart sýretshiniń maıly boıaýmen salǵan Prezıdentimiz Q.Toqaevtyń portretin syıǵa tartty. Razylyǵyn bildirgen aqyn depýtat sýretshiniń qolyn alyp, portret óner shyǵarmasy retinde jaqsy salynǵanyn, óıtkeni óziniń de mamandyǵy sýretshi ekenin, QazPI-diń kórkemsýret-grafıka fakýltetin bitirgenin aıtty.
Budan basqa halyq qalaýlysy “Aq jol” partııasy Shymkent qalasy fılıaly tóraǵasy Álimhan Ábjanov jáne partııa belsendilerimen birge «Qarttar úıin» aralap, olardyń turmys-tirshiligimen tanysyp, oń baǵa berdi. Qarııalar oǵan qaıta-qaıta aq batalaryn berip, rızashylyqtaryn bildirdi : «Bizdiń mekemege de QR Parlamenti Májilisiniń depýtaty keledi eken-aý»-dep tań qalyp, Aq jol tilep shyǵaryp saldy.
“Adyrna” ulttyq portaly
