Nūrsūltan Nazarbaev halyqaralyq äuejaiy "World Airport Awards" atalymy boiynşa Ortalyq Aziia men TMD-daǧy üzdık öŋırlık äuejai dep tanyldy. Marapat 2022 jylǧy 16 mausymda Parijdegı EKSPO jolauşylar terminalynda tabys etıldı. Būl turaly industriia jäne infraqūrylymdyq damu ministrlıgınıŋ azamattyq aviasiia komitetı jariialady, dep habarlaidy “Adyrna” ūlttyq portaly.
"Bız Nūrsūltan Nazarbaev halyqaralyq äuejaiyn 2022 jyly Ortalyq Aziia men TMD-daǧy üzdık öŋırlık äuejai retınde osy maŋyzdy marapatqa ie boluymen qūttyqtaimyz. Soŋǧy ekı jyl bükıl älemdegı äuejailar üşın öte kürdelı ärı qiyn kezeŋ boldy. Olar COVID-19 pandemiiasyna bailanysty köptegen şekteulerge tap keldı. Qazırgı künde äue tasymaldary qalypty deŋgeige qaita oraldy. Osy rette Nūrsūltan Nazarbaev halyqaralyq äuejaiynda äue tasymaldary eŋ joǧary standarttartar boiynşa oryndauda. Sondyqtan da atalǧan bedeldı syilyqty osy äuejaiǧa beruge şeşım qabyldandy", – dep atap öttı Skytrax bas direktory Edvard Pleisted.
Aita keteiık, "World Airport Awards" – älemdık äuejailar industriiasyndaǧy eŋ bedeldı marapat. Üzdıkter dauys beru nätijesınde jäne arnaiy jürgızıletın jahandyq saualnama boiynşa anyqtalady.
"Üzdıkterdı anyqtau üşın älemdegı 550-den astam äuejaidaǧy jolauşylarǧa qyzmet körsetu sapasy men yŋǧailylyq jan-jaqty saraptalǧan. Būl syilyq – jahandyq äuejai industriiasy üşın sapa standarty bolyp sanalady", – deidı "Nūrsūltan Nazarbaev halyqaralyq äuejaiy" AQ Basqarma töraǧasy Ǧabit Täjımūratov.
Marapatty aluda äuejai qyzmetkerlerınıŋ jäne QR İİDM Azamattyq aviasiia komitetı qyzmetkerlerınıŋ eŋbegın atap ötu qajet. Olar kündelıktı eŋbegı arqyly jolauşylar tasymalyn yŋǧaily ärı qauıpsız ūiymdastyruda.
Saualnama 8 ai kölemınde jürgızılıp, oǧan 100-den astam ūlt ökılınen tūratyn äuejai klientterı qatysqan. Zertteu qorytyndysy äuejaidyŋ klientterge qyzmet körsetu sapasy jäne tırkeu, ūşyp kelu, transfer, satyp alu, qauıpsızdık, pasporttyq baqylau syndy negızgı körsetkışter boiynşa şyǧarylǧan.
”Adyrna” ūlttyq portaly
