Nursultan Nazarbaev halyqaralyq áýejaıy "World Airport Awards" atalymy boıynsha Ortalyq Azııa men TMD-daǵy úzdik óńirlik áýejaı dep tanyldy. Marapat 2022 jylǵy 16 maýsymda Parıjdegi EKSPO jolaýshylar termınalynda tabys etildi. Bul týraly ındýstrııa jáne ınfraqurylymdyq damý mınıstrliginiń azamattyq avıaııa komıteti jarııalady, dep habarlaıdy “Adyrna” ulttyq portaly.
"Biz Nursultan Nazarbaev halyqaralyq áýejaıyn 2022 jyly Ortalyq Azııa men TMD-daǵy úzdik óńirlik áýejaı retinde osy mańyzdy marapatqa ıe bolýymen quttyqtaımyz. Sońǵy eki jyl búkil álemdegi áýejaılar úshin óte kúrdeli ári qıyn kezeń boldy. Olar COVID-19 pandemııasyna baılanysty kóptegen shekteýlerge tap keldi. Qazirgi kúnde áýe tasymaldary qalypty deńgeıge qaıta oraldy. Osy rette Nursultan Nazarbaev halyqaralyq áýejaıynda áýe tasymaldary eń joǵary standarttartar boıynsha oryndaýda. Sondyqtan da atalǵan bedeldi syılyqty osy áýejaıǵa berýge sheshim qabyldandy", – dep atap ótti Skytrax bas dırektory Edvard Pleısted.
Aıta keteıik, "World Airport Awards" – álemdik áýejaılar ındýstrııasyndaǵy eń bedeldi marapat. Úzdikter daýys berý nátıjesinde jáne arnaıy júrgiziletin jahandyq saýalnama boıynsha anyqtalady.
"Úzdikterdi anyqtaý úshin álemdegi 550-den astam áýejaıdaǵy jolaýshylarǵa qyzmet kórsetý sapasy men yńǵaılylyq jan-jaqty saraptalǵan. Bul syılyq – jahandyq áýejaı ındýstrııasy úshin sapa standarty bolyp sanalady", – deıdi "Nursultan Nazarbaev halyqaralyq áýejaıy" AQ Basqarma tóraǵasy Ǵabıt Tájimuratov.
Marapatty alýda áýejaı qyzmetkerleriniń jáne QR IIDM Azamattyq avıaııa komıteti qyzmetkerleriniń eńbegin atap ótý qajet. Olar kúndelikti eńbegi arqyly jolaýshylar tasymalyn yńǵaıly ári qaýipsiz uıymdastyrýda.
Saýalnama 8 aı kóleminde júrgizilip, oǵan 100-den astam ult ókilinen turatyn áýejaı klıentteri qatysqan. Zertteý qorytyndysy áýejaıdyń klıentterge qyzmet kórsetý sapasy jáne tirkeý, ushyp kelý, transfer, satyp alý, qaýipsizdik, pasporttyq baqylaý syndy negizgi kórsetkishter boıynsha shyǵarylǵan.
”Adyrna” ulttyq portaly
