Reshat Nurı GÚNTEKIN,
túrik jazýshysy.
Qyryqtyń qyrqasyndaǵy baı saýdager Halıt Beı bólmeniń bir buryshynda oınap otyrǵan balasyna:
– Javat, beri kel… Qarashy, saǵan birdeme ákeldim, – deıdi.
– Ol ne, papa? – dep balasy kergıdi.
Ákesi qolyndaǵy shokoladty qaltasynan shyǵaryp:
– Mine, mynaý… Toqtaı tur, tegin emes, betińnen súıgizbeseń bermeımin…
– Jaqsy, papa… Minekeıińiz, – dep, ákesiniń tizesine otyra qalyp betin taqaıdy.
Osy sát Halıt Beıdiń báıbishesi Ferhýnde hanym:
– Halıt, saǵan qansha aıtamyn, myna balany súıe bermeshi!.. – dep nazdana qaraıdy.
– Saspa, saǵan da birdeme qaldyramyz ǵoı… – deıdi Halıt Beı.
– Súıe berme degen soń, qoısańshy endi!
– Qoıatyn nesi bar? Súıem be, súımeımin be, onda sharýań qansha?!
– Sharýań qansha degeniń ne?! Balany osylaı qurtasyń ǵoı… Betin ábden soryp tastadyń, sozyp jiberdiń… Temekiniń ıisinen men de súıe almaı júrmin. Balamyzdyń betinen temekiniń sasyq ıisi shyǵady…
– Baıaǵydan beri sony aıtsańshy… Sen ózińdi ǵana oılaısyń. Endeshe, meni tyńdap al! Men qyryq jasymda bala súıdim, sondyqtan óle-ólgenshe súıip ketkim keledi…
– Sen balany súıemin dep, bir kúni meni temekiniń sasyq ıisimen tunshyqtyryp óltiresiń ǵoı…
– Olaı bolsa, taptym… Balanyń eki betin bólip alaıyq. Oń jaǵy meniki bolsyn, sol jaq seniki…
– Jaraıdy. Biraq meniń jaǵyma jolaı kórseń… Balapanym, mynaý jaǵyń meniki, eshkimge súıgizbe, jaraı ma!
– Al betińniń myna jaǵy meniki. Bireýge súıgizetin bolsań saǵan eshteme ákelmeımin. Sondyqtan, baıqa, balam!
– Al balam, betińniń qaı jaǵy meniki? – deıdi sheshesi.
Balasy saýsaǵymen sol jaǵyn kórsetip: – Mynaý jaq, – deıdi.
– Al meniki she? – degen ákesine oń jaǵyn nusqap: – Mine, – dep, betiniń eki jaǵyn eki qolymen ustap: – Mynaý jaq mamaniki, mynaý jaq papaniki… – deıdi.
Áke-sheshe, bala arasyndaǵy bóliske túsken áńgime osymen bitip, keshke jaqyn bir ózi ǵana tamaqtanyp otyrǵan úıdiń erke balasy qyzmetshi aspaz aǵasyna:
– Aǵataı, maǵan qurma táttisinen bershi, mamam: “Betiń bórtip ketedi” – dep bermeıdi… – deıdi.
Osy sátte elýdi eńsergen tolyq aspaz aǵasy:
– Beremin ǵoı, shyraǵym… Biraq betińnen súısem ǵana beremin, – deıdi qyrsyqqanda.
– Bolmaıdy, mama ursady.
– Mamańa bildirmeımiz.
– Onda papam maǵan shokolad ákelmeıtin bolady.
Aspaz aǵasy júgirip júrgen balany ustap alyp:
– Sen súıgizbeseń de men báribir súıip alamyn, – dep, balanyń qarsylyǵyna qaramaı «sol jaq» betinen súıip alady.
Kóp ótpeı úıge shaqyrylǵan qonaqtar kelip jaıǵasady. Óńkeı yǵaılar men syǵaılar… Aralaryndaǵy meshittiń ımamy bir áńgimeni aıtyp otyrǵanda úıdiń erke balasy tomsyraıyp kelgende ákesi:
– Balam, ne boldy? – dep shoshyp ketedi.
Balada ún joq, qabaǵy qatý, erni dúrdıgen…
Yńǵaısyzdyqty seıiltpek bolǵan meshit ımamy:
– Batyrym, ne bolyp qaldy? Aıtshy, káne! – degende, bala bolǵandy baıandap:
– Anaý aspaz aǵaı… Baǵana «mamamnyń betinen» súıip aldy… – degen eken
Túrik tilinen tárjimalaǵan
Málik OTARBAEV