Jasotandyqtar kótergen júk

1905
Adyrna.kz Telegram

Búginde Aqtóbe oblysy boıynsha jasotandyqtardyń qatarynda 2000-ǵa jýyq jas bar. Jastar qanatynyń qataryndaǵy belsendi jastardyń deni — qaladaǵy joǵary oqý oryndary men kolledj stýdentteri. Bıyl partııa jumysyn alǵa jyljytýda dál osy jasotandyqtar men óńirlik keńes kóp jumys atqardy. Bul jastar — jaýapkershiliktiń júgin kóterip, el damýy jolynda úzdiksiz jumys istep júrgen jandar.

Qazirgi tańda óńirdegi ár aýdanda «AMANAT» partııasynyń fılıaly janyndaǵy jastar qanaty jumys isteıdi. Osy fılıal jastarynyń qatysýymen, «Jas Otan» JQ Aqtóbe oblystyq fılıalynyń uıymdastyrýymen bıyl jyl basynan beri 60-tan astam is-shara ótti. Máselen,  jastardy otansúıgishtikke tárbıeleý baǵytyndaǵy «QAISAR» áskerı patrıottyq jobasy aıasynda mekteptiń joǵary klass oqýshylary men kolledj stýdentterin Aqtóbe qalasyndaǵy áskerı bólimderdegi sarbazdardyń ómirlerimen tanystyrdy. «Erlik saǵaty» ataýymen QR Ulttyq ulannyń №6655 bóliminiń 1-shi zenıttik vzvod komandıri, leıtenat Ulan Myrzabaıdy jastarmen kezdestirdi. Atalǵan jobanyń aıasynda mektepterdiń joǵary synyp oqýshylary arasynda áskerı patrıottyq oıyndar uıymdastyrylyp, óńirdegi irikteý kezeńinen jeńiske jetken komanda Nur-sultan qalasynda ótken respýblıkalyq jarysqa qatysty.

Kóktemgi sý tasqyny saldarynan zardap shekken otbasylarǵa kómek kórsetý úshin eriktiler shtabyn quryp, qıyn jaǵdaıda qalǵan otbasylarǵa kómekke qol sozdy. Sondaı-aq Ulystyń uly kúnin jastar arasynda aýqymdy túrde toılaýǵa bastama kóterip, qaladaǵy ortalyq stadıon mańyndaǵy Arbat alańynda «Jastar aýyly» ataýymen ulystyń uly kúnin toılady. Oblystyq jastar resýrstyq ortalyǵymen jáne aqtóbelik belsendi jastardyń basy qosylyp, toılanǵan ulystyń uly kúni merekesinde qazaq halqynyń ulttyq qundylyqtary meılinshe nasıhattaldy.

— «Igi ister» qaıyrymdylyq akııasy aıasynda oblystyq «Nur ǵasyr» meshitimen, «Ańsar» aqparattyq taldaý ortalyǵymen, oblystyq Jastar resýrstyq ortalyǵymen birlesip 120 otbasyǵa azyq-túlik sebetterin jetkizip berdik. Osy akııanyń aıasynda bir kúndik tegin taksı qyzmeti uıymdastyryldy. Sondaı-aq jasotandyqtar «Úmit» balalar úıindegi tárbıenýshilerge erekshe kóńil kúı syılap, olarǵa syılyqtar taratty, — deıdi «Jas Otan» JQ Aqtóbe oblystyq fılıalynyń tóraǵasy Anýar Iskarın.

Onyń aıtýynsha, jyl basynan beri stýdentterge arnalǵan jataqhanalardyń áleýmettik turmystyq jaǵdaılaryna monıtorıng júrgizip keledi. Sonyń arqasynda oblysta jataqhanalar máselesi sheshilýde. Sondaı-aq bıyl qala jastary «Taza like» partııalyq jobasy aıasynda senbilik jumystaryna jáne aǵash kóshetterin otyrǵyzý sharalaryna belsene atsalysty.  Jyldaǵy úrdis boıynsha Uly Jeńis merekesi qarsańynda jasotandyqtar qaladaǵy batyrlar qurmetine ornatylǵan eskertkishterge de tazalyq jumystaryn júrgizdi.

— «AMANAT» partııasynyń kýbogine arnalǵan HH respýblıkalyq pikirsaıys týrnıriniń oblystyq irikteý kezeńin ótkizip, óńir namysyn qorǵaý úshin resýpblıkalyq týrnırge komanda joldady. Nátıjesinde Aqtóbe oblysy atynan qatysqan «APO» debat komandasy júldeli II oryndy ıelenip qaıtty, — deıdi ol.

Qazirgi tańda aýdan jáne aýyl jastarymen baılanys ornatý maqsatynda «Jas Otan» jastar qanaty jańa joba ázirlep jatyr. Jobanyń ataýy – «Órleý». Bul joba aıasynda arnaıy mentorlar aýyl jastarymen baılanys ornatyp, olardy jan-jaqty qoldaý maqsatynda eldi mekenderdi aralaıtyn bolady. Qazirgi tańda atalǵan jobanyń tujyrymdamasy bekitilip jatyr.

— Jastarǵa óz máselelerin minberge shyǵyp kóterýlerine, onyń sheshilýin baqylaýǵa múmkindikter berilip otyr. «AMANAT» partııasy bul isti ótken jyly saılaý naýqany aıaqtalysymen qolǵa alǵan bolatyn. Partııa ár sala boıynsha qurǵan qoǵamdyq keńesterdiń qatarynda Jastardy qoldaý jónindegi keńesiniń qurylýyna asa mán berdi. Búginde bul keńes memlekettik jastar saıasaty máseleleri jónindegi zańnamany jetildirýge,  jastardyń quqyqtary men zańdy múddelerin qorǵaýdy qamtamasyz etýge yqpal etip, jastarǵa baǵyttalǵan memlekettik baǵdarlamalar men jobalardyń iske asyrylý tıimdiligine taldaý júrgizip,  jastar saıasaty salasyna qatysty ózge de máselelerdi talqylaıdy, — deıdi Anýar Iskarın.

Al «AMANAT» partııasy Aqtóbe oblystyq fılıaly janyndaǵy Jastardy qoldaý jónindegi aımaqtyq qoǵamdyq keńestiń tóraǵasy Baqyt Moldagereevanyń aıtýynsha, ótken jyly keńestiń birqatar otyrystarynda óńir jastaryna qatysty máseleler qaralyp, jastardyń ıgiligi úshin oryndalýǵa tıis mindetterdi baqylaýǵa aldy. Nátıjesinde, partııanyń «Ózgerister joly: Ár azamatqa laıyqty ómir!» saılaýaldy baǵdarlamasy men «Jastar – Otanǵa!» baǵdarlamasyn tıimdi iske asyrý maqsatynda ázirengen aımaqtyń Jol kartasyndaǵy mejelengen mindetter ýaqytynda ári tolyq oryndaldy.

— Bıylǵy jyl bastalǵannan beri atalǵan keńestiń eki otyrysy ótti. Quramynda 15 múshesi bar aımaqtyq keńes bul joly jastar arasyndaǵy qylmysty azaıtý boıynsha qabyldanyp jatqan keshendi sharalar jáne 14-29 jasqa deıingi 80 myńnan astam jastardy qamtı otyryp, quqyq buzýshylyqtarǵa nóldik tózimdilikti qalyptastyrý jónindegi jobalardy iske asyrý jolymen jastar arasyndaǵy quqyq buzýshylyq deńgeıin tómendetý, jastardyń densaýlyǵyn jaqsartý boıynsha qabyldanyp jatqan keshendi sharalar,14-29 jastaǵy áıelder arasynda túsik jasatýdy azaıtý, S.Báıishev atyndaǵy ýnıversıtet janyndaǵy jataqhananyń qurylysy, úsh aýysymdy mektepter sanyn azaıtý, on alty mekteptiń qurylysy, jumys isteıtin jastar úshin jalǵa beriletin turǵyn úı memlekettik baǵdarlamasyn iske asyrý barysy jáne jas otbasylardyń turǵyn úı problemalaryn sheshý jónindegi óńirlik baǵdarlamalardy qurý máselelerin qarady, — deıdi B.Moldagereeva.

Onyń aıtýynsha, jastardy qoldaý jónindegi aımaqtyq qoǵamdyq keńestiń jyldyq is-sharalar josparyna sáıkes, keńestiń otyrysy aı saıyn ótip, onda jastarǵa qatysty máseleler qaralatyn bolady. Odan bólek, Aqtóbe óńiri boıynsha NEET sanatyndaǵy jastardyń derekter bazasyn qurý, aýyl jastarymen kezdesý, keminde 20 stýdenttik jataqhananyń  áleýmettik-turmystyq jaǵdaılaryn monıtorıngileý, 14 jastan 29 jasqa deıingi 80 myńnan astam jastardy qamtı otyryp, quqyq buzýshylyqtarǵa nóldik tózimdilikti qalyptastyrý jónindegi jobalardy iske asyrý jolymen jastar arasyndaǵy quqyq buzýshylyq deńgeıin tómendetý syndy ózge de máseleler tóńireginde mindetter mejelenip otyr.

 

Danagúl BAIMUQASh,

"Adyrna" ulttyq portaly.

Pikirler