Oralda áleýmettik osal topqa jatatyn 200-ge jýyq adam úı kezeginen negizsiz shyǵarylǵan. Al olarǵa tıesili baspanany sheneýnikter basqaǵa bergen, dep habarlaıdy «Adyrna» tilshisi «Astana» arnasyna silteme jasap.
Amalyn tapqan pysyqtar menshiginde úıi bolsa da, páterge muqtaj jandardyń kezegine kezekten tys kiripti. Osynyń kesirinen taǵdyr tálkegine túsken jetimder eseıip, otbasyn qursa da, balalarymen birge jetimdiktiń taýqymetin áli tartyp otyr.
«Áleýmettik osal topqa jatatyn 200-ge jýyq adamnyń negizsiz esepten shyǵarylyp tastalǵandary anyqtaldy. Olar ıaǵnı, jetim balalar, kópbalaly otbasylar, tolyq emes otbasylar. Barlyq kezekten shyǵarylǵan azamattardyń kezegin qalypqa keltirý boıynsha tıisti sharalar qabyldandy. Memlekettik organdarǵa tıisti usynymdar berildi. Olardyń nátıjesi boıynsha, usynymdardy oryndaý boıynsha naqty sharalar qabyldandy»,– dep túsindirdi Batys Qazaqstan oblysy boıynsha sybaılas jemqorlyqqa qarsy qyzmettiń basqarma basshysynyń orynbasary Álııa Denızbaeva.
Sheneýnikterdiń sharapatyna kenelip, kezekten tys úı alǵan 169 adamnyń kim ekeni belgisiz. Sybaılas jemqorlyqqa qarsy qyzmettiń dereginshe, bul azdaı páterge muqtaj emes taǵy 247 adamǵa baspana berilipti. Al oblysta 1800 jetimek úmitin úzbeı, úı kezegin kútip júr. Olardyń nesibesine ortaqtasyp, úıdi basqaǵa bergen sheneýnikter tek tártiptik jazamen qutylýy múmkin.
