Mektep ashanalarynyŋ jūmysy turaly Bılım jäne ǧylym ministrlıgı Ashat Aimaǧambetov öz telegram kanalyna jazba jariialady, dep habarlaidy “Adyrna” ūlttyq portaly.
“Öŋırlerge jiı şyǧyp, auyl mektepterın de, qala mektepterın de aralau men üşın maŋyzdy. Mūǧalımdermen, oquşylarmen jäne ata-analarmen kezdesuler ministrlık qabyldaǧan şeşımderdıŋ ıs jüzınde qalai jüzege asyrylyp jatqanyn körsetedı.
Ministrlıktıŋ mektepter, kolledjder jäne balabaqşalardy basqaru bölıgınde qūzyretı joq ekenı qūpiia emes. Olardy qarjylandyru, jūmysyn ūiymdastyru jäne ony jüzege asyru, basşylardy taǧaiyndau jäne bosatu siiaqty jūmystyŋ barlyǧy zaŋmen äkımdıkterge bekıtılgen. Sondyqtan baqylauda ūstap otyrudyŋ maŋyzdylyǧy joǧary.
Öŋırlerdegı mektepterdı aralaǧanda özım üşın türtıp qoiǧan özektı mäselelerdıŋ bırı – mektep ashanalarynyŋ jūmysy.
Būl baǧytta baqylauǧa alynatyn jäne normativtık qūqyqtyq aktıler deŋgeiınde şeşıletın bırneşe problema bar.
1. Osyǧan deiın ashanalarda qolma-qol aqşasyz tölem jüiesın engızu talabyn bekıttık. Mūnyŋ bırneşe artyqşylyǧy bar. Būl gigienanyŋ saqtaluyna ärı kezektıŋ tez jyljuyna kömektesedı. Sondai-aq balalarda qolma-qol aqşanyŋ bolmauy olardy qauıpterden saqtaidy. Ata-analarǧa da şyǧyndardy baqylau oŋaiyraq bolady. Bıraq köbınese qolma-qol aqşasyz tölem jüielerı öşırılıp, paidalanylmaidy.
2. Bufet önımderınıŋ qūny. Mektep ashanasynda 0,5 litr su 300 teŋgeden nemese bälışter men toqaştardyŋ dükenderdegı baǧadan joǧary baǧada satylatyny sūraq tuyndatady. Bır qalada bırdei önım baǧasynda 50-70%-ǧa deiın aiyrmaşylyq boluy mümkın.
3. Keibır öŋırler ashanalardy MJÄ (Memlekettık-jekemenşık ärıptestık) arqyly jeke käsıpkerlerge berıp jür. Bız MJÄ-nıŋ damuyn qoldaimyz. Bıraq keide būl konkursty ötkızbeu üşın jäne ashanany käsıpkerge tıkelei (10-15 jylǧa) beru üşın jasalady.
Bırınşıden, bız konkurssyz Jeke qarjylyq bastama (JQB) boiynşa emes, konkurs ötkızılu kerek dep sanaimyz. Ekınşıden, salym somasy az mölşerde, mysaly, 5-7 mln teŋge emes, tiıstı kölemde boluy maŋyzdy. Körsetıletın qyzmetterdıŋ sapasyn este saqtap, būl qarajattar toŋazytqyştar, plitalar, üstelder men oryndyqtardy satyp aluǧa jūmsalatynyn tüsınu maŋyzdy. Iаǧni, saiyp kelgende käsıpker öz jūmysyna qarajat salady. Üşınşıden, bız jūmystyŋ aqylǧa qonymdy merzımderın belgılegendı qoldaimyz.Ashanany 15-20 jylǧa kelısımşart jasau sūraq tuǧyzady.
4. Mektep ashanalarynda Densaulyq saqtau ministrlıgınıŋ būiryǧymen tyiym salynǧan önımderdı satu (mysaly, fastfud, gazdalǧan susyndar, chipsy jäne t.b.). Ministrlıktıŋ qyzmetkerlerı bırneşe oblysqa baryp, bırqatar mektepte osyndai faktılerdı anyqtady. Äsırese Türkıstan oblysynda. Mūndai faktıler anyqtalǧan jaǧdaida dereu SES organdaryna habarlasu qajet.
Ministrlıkte osy problemalardy normativtık deŋgeide şeşu üşın jūmys toby qūryldy. Bız zaŋnamaǧa bırqatar tolyqtyru engızuge bastama jasadyq, olardyŋ şeŋberınde arnaiy normalar bekıtıledı. Būl normalar - ashanalardaǧy bufet önımderınıŋ baǧasyn retteu, aşyq konkurstar jäne aqylǧa qonymdy kezeŋge MJÄ arqyly ashanalardy beru, qolma-qol aqşasyz tölemdı jäne tamaqtanudyŋ tiıstı sapasyn qamtamasyz etu. Bız käsıpkerlerdıŋ müddelerımen de sanasu keregın tüsınemız, bıraq bız üşın balalar ärqaşan bırınşı orynda. Demek, būl olardyŋ qūqyqtary men müddelerın qorǧaudy bıldıredı.
Ministrlık atalǧan baǧyttar boiynşa jūmysty jalǧastyrady”,- dep jazdy ol.
“Adyrna” ūlttyq portaly
