Ulttyq mýzeı basshylyǵy bıýdjet qarajatyn jymqyrdy degen kúdikke ilindi. Bul týraly Sybaılas jemqorlyqqa qarsy is-qımyl agenttiginiń baspasóz qyzmeti jazdy, dep habarlaıdy «Adyrna» tilshisi.
«Nur-Cultan qalasy boıynsha Cybaılas jemqorlyqqa qarsy qyzmet QR Mádenıet jáne sport mınıstrliginiń «Qazaqstan Respýblıkasynyń Ulttyq mýzeıi» RMQK laýazymdy tulǵalaryna qatysty «Altyn adamnyń álem mýzeılerine sherýi» halyqaralyq kórmesin ótkizý boıynsha Memlekettik satyp alý týraly shart aıasynda 146 mln teńge somasynda bıýdjet qarajatyn jymqyrý belgileri boıynsha sotqa deıingi tergeý júrgizýde.
Sharttyń jalpy somasy 1,2 mlrd teńgeni quraıdy»,— delingen habarlamada.
Tergeý sotynyń sankııasymen qazirgi ýaqytta tintý, sondaı-aq kýálardan jaýap alý jáne basqa da tergeý áreketteri júrgizilýde.
Is boıynsha túpkilikti sheshim qylmystyq is júrgizý zańnamasynyń talaptaryn oryndaý nátıjeleri boıynsha qabyldanatyn bolady.
Ózge aqparat tergeý múddesinde jarııa etilmeıdi.
«Adyrna» ulttyq portaly
