Reseıdiń Qytaıdaǵy elshiligi Qytaıdyń ońtústik-batysyndaǵy Chýnın qalasynyń áýejaıynda órtengen ushaqta Reseı azamattarynyń bar-joǵyn tekserip jatyr, dep habarlady "Adyrna" ulttyq portaly "RIA Novostıge" silteme jasap.
Elshiliktiń baspasóz attashesi Georgıı Egorovtiń aıtýynsha, elshilik ushaqta Reseı azamattarynyń bolǵan-bolmaǵanyn tekserip jatyr.
Beısenbi kúni jergilikti ýaqyt boıynsha saǵat 8.09-da (Máskeý ýaqytymen 3.09) Chýnın qalasynan Tıbet avtonomııalyq aımaǵynyń Nınchı qalasyna TV9833 reısin oryndaǵan Tibet Airlines jolaýshylar ushaǵy Chýnın qalasyndaǵy zıanbeı áýejaıynda ushyp kóterilý kezinde ushý-qoný jolaǵynan shyǵyp, órtenip ketti. Bortta 113 jolaýshy men 9 ekıpaj múshesi bolǵan, barlyǵy aman, biraq 40-tan astam adam jaraqat alyp, aýrýhanaǵa jatqyzyldy. Oqıǵanyń sebebi áli anyqtalǵan joq, tergeý júrip jatyr.
Bul — Qytaıdaǵy bıylǵy ekinshi iri avıaııalyq apat. Buǵan deıin Kýnmın-Gýanchjoý baǵytyndaǵy MU5735 reısin oryndaǵan Boeing 737 ushaǵy 21 naýryzda Qytaıdyń ońtústigindegi Gýansı-Chjýan avtonomııalyq aýdanyndaǵy Ýchjoý qalasyndaǵy Ten okrýginde apatqa ushyraǵan bolatyn. Bortta 132 adam (barlyǵy Qytaı azamattary), onyń ishinde 123 jolaýshy men toǵyz ekıpaj múshesi bolǵan, olardyń barlyǵy qaıtys boldy dep jarııalandy.
2015 jyldan beri qoldanysta bolǵan laınerdiń apatqa ushyraýynyń yqtımal sebepteri ázirge belgisiz. Sarapshylar tabylǵan "qara jáshikterdi" zertteýdi jalǵastyrýda.
Boeing 737 ushaǵynyń apaty Qytaıdaǵy sońǵy 11,5 jyldaǵy eń aýyr áýe apaty boldy, buǵan deıin Qytaıdyń azamattyq avıaııasy 138 aı qatarynan qaýipsiz ushyp kelgen.
"Adyrna" ulttyq portaly
