Aqtóbe oblysy Yrǵyz aýdany Nura aýylynyń turǵyny Qaırat Aıjarqynuly “Adyrna” ulttyq portalyna hat jazyp, aýyl turǵyndarynyń jan-aıqaıyn jetkizdi. Aıtýynsha, ol turyp jatqan aýylda ınternet te, jol da joq.
“Yrǵyz - Nura joly qashan jóndeledi eken? Yrǵyz - Torǵaı - Arqalyq joly salynady dep edi, aıtqanyna on jyl boldy. Asfalt salynady degen, halyq qashanǵy kóktem men qysta qınalýy kerek? Aıtýlarynsha, Yrǵyz - Nura joly Respýblıkaǵa qaraıdy eken. Oblys, aýdan, aýyl ákimi eshteńe sheshe almaıdy eken”, - deıdi ol.
Sondaı-aq, Qaırat ınternet úshin áli saı men qyr jaǵalap júrgenderin aıtyp kúıindi.
“Aqtóbe oblysy Yrǵyz aýdany Belsher aýylynda halyq óz kúshimen turǵyzǵan munara bar. Internetti ákelip qondyryp beredi degenine eki jyl boldy. Áli jaýap joq. Belsher aýylynyń halqy qyr men saı jaǵalap júr. Internet ustaý úshin, balalar bilim alý úshin qyrdyń basyna shyǵyp otyrady”, - dep jazdy turǵyn.
Aqtóbe oblysy Yrǵyz aýdany Nura aýylynyń turǵyndary joǵaryda atalǵan máseleler boıynsha jaýapty oryndar qadaǵalaýyn suraıdy.
“Adyrna” ulttyq portaly
