Maŋǧystau oblysynyŋ Mūnaily audanynda ekı bala şūŋqyrdaǧy suǧa batyp kettı, dep habarlaidy «Adyrna» tılşısı QazAqparatqa sılteme jasap.
Qaiǧyly oqiǧa Mūnaily audanynyŋ Batyr auylynda bolǧan. Oblystyq tötenşe jaǧdailar departamentı baspasöz qyzmetınıŋ mälımetıne sensek, üidıŋ janyndaǧy tereŋdıgı metrden asatyn şūŋqyr nöser jaŋbyrdan keiın suǧa tolyp qalǧan.
Būl şūŋqyrdy üi ielerı äjethana tūrǧyzu üşın qazǧan. Atasy men äjesınıŋ üiıne bara jatqanda 2008 jäne 2012 jyly tuǧan ekı bala älgı şūqyrǧa tüsıp ketken. Olar şūŋqyrdaǧy sudan öz betınşe şyǧa almaǧan.
Qūtqaruşylar balalardy közden tasa etpeu kerektıgın, qūdyqtar men aryqtardyŋ betın jauyp jüru kerektıgın taǧy da eske salady.
«Adyrna» ūlttyq portaly
