Búgin syrboıylyqtar 1 mamyr – Qazaqstan halqynyń birligi kúnin zor yqylaspen, sán-saltanatymen qarsy aldy. Ortalyq alańnan bastaý alǵan dýmandy is-sharada túrli ult ókilderiniń áni men bıi, salty men dástúri qatar órbip, myzǵymas birliktiń aıqyn kórinisi sezildi, dep jazady "Adyrna" ulttyq portaly.
Ortalyq aýmaǵy merekelik nyshandy sıpattaıtyn atrıbýttarmen árlenip, áýe shary men jer shary birliktiń sımvolyn aıshyqtady. Merekede oblys ákimi Nurlybek Nálibaev Syr halqyn birlik kúnimen quttyqtap, aqjarma tilegin arnap, turǵyndardy táýelsizdik, tatýlyq pen turaqtylyq syndy baǵa jetpes qundylyqtardy saqtaýǵa shaqyrdy.
- Birligi jarasqan eldiń tirligi de tórge ozady. Búgingi tańda uly maqsattardy ulyqtap, dostyqqa qushaǵyn aıqara ashqan Qazaqstan zamanaýı álemde el Prezıdenti Qasym-Jomart Kemelulymen birge damýdyń jańa kóshin bastady. Berekeli birligimiz ben tatý tirligimizdiń arqasynda serpindi isterimiz nátıjeli bolyp, óńirimiz jańa deńgeıge kóterilip, elimizdiń irgeli oblystarynyń qatarynan kórinedi dep senemin. Judyryqtaı jumylǵan aýyzbirshilikpen ortaq múdde jolyndaǵy qıyndyqtardy qaıyspaı kóterip, qýanyshymyzdy bólisip, aq nıetimizdi, asyl qasıetterimizdi tanytyp kelemiz. Bul - tili basqa bolsa da, tilegi bir, júzi basqa bolsa da, júregi bir jurtymyzdyń aınymas birliginiń sheksiz dáleli. Bizdiń kúshimiz – bolattaı berik birlikte!,-dedi oblys ákimi.
Ortalyq alańdaǵy negizgi shara konerttik baǵdarlamaǵa ulasty. Dýmandy merekede qazaq estradasynyń jarqyn juldyzy Serik Ibragımov Syr eline merekelik án-shashýyn alyp keldi. Sondaı-aq, ózge de tanymal óner ıeleri kórermen kóńil-kúıin kóterip, elge qýanysh syılady.
Munan keıin oblys ákimi elmen birge túrli ult ókilderiniń qolóner buıymdary qoıylǵan kórmeni aralap, balalar shyǵarmashylyǵyn toptastyrǵan shaǵyn qoıylymdy kórip, túrli sporttyq oıyndardy tamashalady.
"Adyrna" ulttyq portaly
