Almaty ákimdigi qańtar oqıǵalary kezinde búlingen kólik ıelerine 258 mıllıon teńge tóledi. Bul týraly qala baspasóz qyzmeti málimdedi, dep habarlaıdy “Adyrna” ulttyq portaly.
Almaty qalasy aýdandarynyń ákimdikterine avtokólik ıelerinen keltirilgen zalaldy óteý týraly 99 ótinish túskeni habarlandy. Jeke tulǵalarǵa keltirilgen shyǵyndy óteý tetigine sáıkes (Úkimettiń 2013 jylǵy 28 tamyzdaǵy №877 qaýlysymen bekitilgen Terrorızm aktisi saldarynan jeke jáne zańdy tulǵalarǵa keltirilgen múliktik zııandy óteý qaǵıdalary boıynsha) jalpy somasy 258 mıllıon teńgege 54 ótinim qanaǵattandyryldy (Almaly aýdany - 33, Áýezov aýdany - 9, Túrksib aýdany - 12).
"Aýdan ákimdikteriniń qaraýynda búlingen jáne janyp ketken avtokólikter jóninde taǵy 45 ótinim bar (Bostandyq aýdany - 40, Medeý aýdany - 5). Olar boıynsha tólemderdi bıyl 15 mamyrǵa deıingi merzimde júrgizý josparlanyp otyr. Qosymsha ótinimderdiń túsýine qaraı Almatynyń aýdandyq ákimdikteri osy baǵyttaǵy jumysty jalǵastyratyn bolady", - dedi ákimdik ókilderi.
Aıta keteıik, ótinishterdi aýdandyq ákimdikter túsken kúnnen bastap 1 aı ishinde qaraıdy. Múlikke keltirilgen zalaldy baǵalaý ótinish tirkelgen kúnnen bastap 7 kún merzim belgilenedi jáne zardap shegýshiniń ózi tańdaǵan táýelsiz sarapshylar júrgizedi. Baǵalaý boıynsha shyǵystardy júrgizý aýdandyq ákimdikter tulǵasyndaǵy memlekettik organdarǵa júktelgen.
”Adyrna” ulttyq portaly
