«Visit Shymkent» jyl basynan beri 1000-nan asa adamǵa ekskýrsııa ótkizdi

614

Shymkent qalasy Týrızm jáne syrtqy baılanystar basqarmasynyń «Visit Shymkent» týrıstik aqparattyq ortalyǵy jyl basynan beri týrızmniń salalyq baǵyttary aıasynda jalpy sany 12 ekskýrsııa uıymdastyrdy. Atap aıtsaq, óndiristik, tanymdyq-iskerlik, sakraldy oryndar men balalar týrızmi baǵyttary boıynsha 1018 adam ekskýrsııaǵa qatysqan. «2022 jyl - balalar jyly» bolyp bekitilýine baılanysty, ekskýrsııalardyń basym bóligi jasóspirimderge arnaldy.

Jastardyń Shymkent qalasyndaǵy týrıstik nysandar jáne kórikti oryndarmen tanysýy – týǵan ólke tarıhy týraly oı-tanymdaryn arttyrýǵa yqpaly mol. Naqtylaı ótsek, Shymkentke sporttyq saıystar men ǵylymı jobalar baıqaýyna jınalǵan shákirtterge megapolıstiń týrıstik nysandary, ıaǵnı, Shymkent zoobaǵy, Dendrologııalyq saıabaq, “Shym qala” tarıhı-mádenı ortalyǵy jáne Etnoaýyl syndy oryndary erekshe áser qaldyrýda. Sondaı-aq, ortalyq áleýmettik týrızm baǵyty boıynsha kópbalaly otbasylardan shyqqan búldirshinderge erekshe basymdyq bere otyryp, olardy qala tarıhymen tanystyrý jáne demeýshiler esebinen kómek kórsetý sharalaryn ótkizýdi qolǵa alǵan.

Týrıstik-aqparattyq ortalyq kelýshiler sanyn arttyrý jáne shahardyń týrıstik áleýetin ilgeriletý baǵytynda «bir tereze» qaǵıdasy boıynsha aqparattyq-konsýltatıvtik kómek kórsetedi. Sonymen qatar, qalamyzdyń kez-kelgen qonaǵyna shahar aýmaǵynda sapaly ári aqysyz qyzmet kórsetetin kásibı gıd-ekskýrsovod qyzmetin usynady. Iaǵnı, ortalyq tarapynan qala tarıhymen jáne mádenı-sakraldy oryndarymen tanysamyn degen kez-kelgen kelýshiler men týrısterge “Visit Shymkent” ázirlegen týrmarshrýttar arqyly tegin ekskýrsııa júrgizedi. Sáıkesinshe, gıd-ekskýrsovodtar suranys boıynsha birneshe tilde aqparat berip, qala tarıhymen tanystyrady.

 

Pikirler
Redakııa tańdaýy