Jambyl oblysynyń ákimi Nurjan Nurjigitovtiń tóraǵalyǵymen ótken keńeste Taraz qalasyndaǵy káriz tazartý nysanynyń máseleleri qaraldy.
Aımaq basshysy máseleniń ózektiligin, bul týraly bir apta buryn jıynda jan-jaqty qaralǵanyn, sol kezde berilgen tapsyrmanyń oryndalý barysyn surady.
Energetıka jáne turǵyn úı kommýnaldyq sharýashylyǵy basqarmasynyń basshysy Qudaıbergen Qorǵanbaev joba boıynsha eki usynys qaralǵanyn jetkizdi.
- Joba úlken. Tehnıkalyq sheshimder qabylaýda kerek bolady,-deı kele oblys ákimi óziniń tıisti orynbasary men ózge de jaýaptylarǵa usynystar boıynsha jan-jaqty taldaý men esepteýler júrgizip, tıimdiligi boıynsha naqty tańdaý júrgizýdi tapsyrdy. Kompanııanyń osy saladaǵy tájirıbesine, sapa men qarjynyń únemdeýge qatysty jaǵdaılarǵa basa nazar aýdarý kerektigin eskertti.
Nurjan Nurjigitov nysandaǵy qazirgi jaǵdaı boıynsha qandaı sheshimder qabyldanyp jatqanyn surady.
Qala ákimi Erjan Jylqybaev «Qazaq sý sharýashylyǵy ǵylymı-zertteý ınstıtýty» JShS qorytyndysyn negizge alyp jáne súzgi alqabynda qaldyq sýlardyń shekten tys kóbeıýine baılanysty apattyq jaǵdaıdyń oryn alýy eskerilip, tótenshe jaǵdaı aýmaǵy retinde qabyldaý máselesi qaralýda ekenin atap ótti.
Búginde oryn alyp otyrǵan ekologııalyq apattyń aldyn alý maqsatynda qosymsha kartalar salýǵa Jambyl aýdanynan 20 ga jer telimi bólingen. Qazirgi tańda mehanıkalyq otrıad mekemesi tarapynan ımarattyń jobalyq-smetalyq qujattary ázirlenýde.
Oblys ákimi jumystardy tezirek bastaýǵa nazar aýdartyp, jaýaptylarǵa naqty tapsyrmalar júktedi.
