Almaty oblysynda 1 myń otbasyna azyq-túlik jáne qarjylaı kómek berildi, dep habarlaıdy “Adyrna” ulttyq portaly.
Panfılov, Eńbekshiqazaq jáne Uıǵyr aýdanynda muqtaj otbasylarǵa berilgen járdem Ramazan aıynyń qurmetine uıymdastyryldy. Zeket jarymjan bala tárbıeleıtin jáne kómekke asa muqtaj jandarǵa úlestirildi. Gýmanıtarlyq kómekke jergilikti kásipkerler 15 mln teńge bólgen.
Aımaqtaǵy iri kásiporynnyń ıesi, Almaty oblysy máslıhatynyń depýtaty Zákirjan Kýzıev pen bıznesmen Serik Aqsýbaev bul úrdisti dástúrge aınaldyrǵan. Osy eki kásip ıesi byltyr Almaty oblysy Penjim aýylynda jappaı tártipsizdik kezinde búlingen halyqtyń dúnıe-múlkin óz esebinen qalpyna keltirgen bolatyn, deıdi jergilikti ákimdik ókilderi.
Oblysta búginge deıin kásipkerlerdiń kómegimen «Myń alǵys», «Biz birgemiz», «Jaqsylyq jasa», «Podarı jızn», «Jaqsylyq jasaýǵa keshikpe», «Júrekten shyqqan alǵys», «Ardagerlerge qurmet», «Balalarǵa mereke syıla» atty ondaǵan qaıyrymdylyq shara ótken. Oǵan joǵarydaǵy kásip ıeleri 100 mln teńgeden astam qarajat bólgen.
Jergilikti ákimdikte tizimde turǵan otbasylardan bólek Ramazan aıynyń qurmetine Jarkent krahmal-sirne zaýyty men qap tigetin zaýyttyń júzdegen jumysshysy azyq-túlik túrindegi kómek aldy.
«Men osynda 15 jyldan beri jumys isteımin. Búkil musylman qaýymǵa assalaýmaǵaleıkúm, Oraza qabyl bolsyn deımin. Osy aıda sansyz shúkirshilik etemin. Bizge mundaı kómek búgin ǵana emes jyl boıy beriledi. Ramazan, Qurban aıt, túrli merekelerde jalaqydan bólek qarjylaı jáne azyq-túlik túrinde qaıtarymsyz kómek uıymdastyrylady. Bıyl da osy zaýyttaǵy birneshe júzdegen jumysshyǵa eshkimdi qaldyrmaı azyq- túlik, sonyń ishinde eń qajetti un, kúrish jáne suıyq maı taratylyp jatyr. Bul kómek qana emes shynaıy kóńil dep túsinemin. Ýaqytynda jalaqyny alamyz. Sondyqtan jumysshylar atynan raqmet aıtqymyz keledi»,- deıdi Jarkent krahmal-sirne zaýytyny jumysshysy Nurmuhamed Jaqybaev.
«Búkil álemde musylman halqy qazir oraza tutyp jatyr. Ár jylda Ramazan aıynda aýqatty adamdar muqtaj jandarǵa kómek qolyn sozyp, saýap alyp jatady. Tipti bir kún bolsa da, qaryndary toıyp, denderi saý bolsyn dep oılaıdy. Aýdanymyzdaǵy kásipker Zákirjan Kýzıev halyqqa qolynan kelgenshe kómegin aıap júrgen joq. Biz onyń deni saý bolsyn, talabyna jetsin dep bata beremiz. Odan tys Panfılov aýdany boıynsha qanshama halyq onyń kásipornynda jumys istep jatyr. Bul da halyqqa degen kómek»,- deıdi Panfılov aýdany Kóktal aýylynyń turǵyny Úmit Shaıahmetova.
Sondaı-aq, Almaty oblysy Panfılov aýdanynyń Ortalyq meshitiniń bas ımamy da osy aıda jasalǵan qaıyrymdylyqty tilge tıek etti.
«Ramazan aıynda qaıyrymdylyq jasaý úlken saýapty amaldardan. Osy qasıetti aıda jasalǵan qaıyrymdylyq 70-ten 700 esege deıin eselenedi. Osy aıda aýdanymyzdaǵy úlken kásipkerler Zákirjan Kýzıev pen Serik Aqsýbaev aǵamyz jáne ózge de kásipkerler jyl saıyn óziniń zeketterin osy ortalyq meshitke kelip taratyp otyrady. Muqtaj kisiler azyq-túlik ózge de zattar alǵanda júzderine kúlki úıirilip, Ramazanda qaıyrymdylyq bola ma dep bizden surap otyrady. Alla taǵala osyndaı saýapty ister men zektterdi saýaptan jazsyn. Qaıyrymdylyq alǵan otbasylar bala-shaǵasymen birge qýanyp, alǵystaryn aıtyp jatqanynyń kýási boldyq»,- deıdi Almaty oblysy Panfılov aýdany ortalyq meshitiniń bas ımamy Serik Sháripuly.
”Adyrna” ulttyq portaly
Sońy.
